Бу къыйын заманда медицинабыз аманына таянмай тура эсе, иги билими бла бирге уллу адамлыгъы да болгъан врачланы себебинденди. Шукур Аллахха, Къарачай-Черкесияда да аллайла аз тюлдюле.

Республикан больницаны эндокринология бёлюмюнде ишлеген Байтокъланы Римма, Рамазанны къызы, аланы бириди. Биз, больницада аны къолуна тюшген бёлек адам, газетни юсю бла анга джюрек разылыгъыбызны билдирирге излейбиз. Бу ишге джюрек излеми бла келгени врач къызны хар атламында танылыб турады. «Врач болургъа нюзюрюм сабийликден огъуна бар эди», - деб кеси да айтады. Школдан алтын медаль алыб чыкъгъан къыз (Черкесскеде 13-чю номерли гимназияны тауусханды) фахмусун Курск шахарда кърал медицина университетде окъугъан кёзюуюнде да танытханды. Андан сора эки джылны Ставрополда медицина институтда эндокринология джаны бла ординатурада билимин ёсдюргенди. 2009-чу джылдан бери уа республикан больницаны эндокринология бёлюмюнде ишлейди. Бу ишин да джарсытмагъанлай, Шимал Кавказ кърал академияны медицина институтуну «пропедевтика внутренних болезней» деген кафедрасында ишлейди. Анда Римманы дерслерине студентле сюйюб джюрюгенлерин да эшитгенбиз.
Больницада ишин а кесибизни юсюбюзде сынаб ётдюк. Терен билими, адеби-намысы, ишленмеклиги болгъан докторду деб бир аууздан айтабыз. Керти врачла, дарман-дары бла къалмай, ауругъанланы джылы сёзлери бла да багъадыла. Ауругъаннга врач энчи эс бёлюб, къайгъырыб, кёлюн кёлтюрсе, аны джюрегинде ышанмакълыкъ орналады, аурууун да аллай бир дженгил хорлайды. Джюрегинде ийманы болгъан адамны шартыды ол.
Алайды да, Риммагъа биз джюрек разылыгъыбызны билдире, анга дунияны ашхылыкъларын теджейбиз. Насыблы болсун. Быллай къызны ёсдюрген ата бла анагъа да бюсюреу-сыпас этебиз. Алгъышлыкъ болсунла!

Сакиев Аман, Кипкеланы Кулият, Карданов Аслан, Хапаланы Руслан, Ёзденланы Супият эмда башхала.