Бу кюнледе Къарачай шахар округну администрациясыны уллу залында, Къарачай шахарны 95-джыллыгъына аталыб, къууанч джыйылыу болгъанды.

Джыйылыугъа КъЧР-ни Правительствосуну Председателини биринчи орунбасары Чеккуланы Хызыр, Къарачай шахар округну мэри Орусланы Марат, КъЧР-ни Халкъ Джыйылыууну (Парламентини) депутатлары, шахар округну Думасыны депутатлары бла администрациясыны къуллукъчулары, джамагъат бирлешликлени келечилери, шахарчыла дагъыда башхала къошулгъан эдиле.
Республиканы Башчысы Темрезланы Рашидни атындан шахарчыланы КъЧР-ни Правительствосуну Председателини биринчи орунбасары Чеккуланы Хызыр алгъышлагъанды. Ол Къарачай шахаргъа ёсюм джолда джетишимле, шахарчылагъа да саулукъ-эсенлик, насыб теджегенди.
Ызы бла сёз Къарачай шахар округну мэри Орусланы Маратха берилгенди.
- Къарачай шахар таб джерде орналгъанды, табигъаты ариуду, хауасы тазады. Сёзсюз да, шахарда урунууну сюйген, халал джюрекли адамла джашайдыла. Бюгюн биз Къарачай шахарда бизге дери джашагъанланы сюйюб эсибизге тюшюребиз. Ала шахаргъа ёсюм алдырыб, туугъан джерлерин аякъ юсюне салыб, экономика, маданият, билим бериу дагъыда башха санагъатланы айнытыб кюрешгендиле. Биз алагъа аны ючюн уллу бюсюреу этебиз. Барыбызны да баш муратыбыз ата-бабаларыбыздан къалгъан ашхы затланы сакълауду, джангы джетишимлеге джетиб, ёсюб келген тёлюлеге бериудю. Бюгюннгю Къарачай шахар къууатлы, ёсюм алыб баргъан шахарды. Ол къуру республикабызны тюл, саулай Эресейни да эм ариу джерлерини бириди дерге боллукъду. Арт кёзюуде шахарда болгъан ашхы тюрлениулеге барыбыз да шагъатбыз. Эм алгъа КъЧР-ни Башчысы Темрезланы Рашидге, шахарны социал-экономика ёсюмюне тыйыншлы эс бёлгени эмда магъаналы джумушланы толтурууда джакълыкъ этгени ючюн, разылыгъымы билдирирге излейме. Шахаргъа айбат тюрсюн алдырыу бла байламлы энтда кёб иш баджарыргъа керекбиз. Ол ишлени барыбыз да биригиб толтурлугъубузгъа сёз джокъду. Алайды да, шахарны 95-джыллыгъы бла алгъышлай, сизге джетишимле, ашхылыкъла теджейме, - дегенди Орусланы Марат.
Джыйылгъанланы алларында Къарачай-Черкес кърал университетни ректоруну борчларын толтургъан Ёзденланы Таусолтан да сёлешгенди.
- КъЧКъУ-ну къуллукъчулары, студентлери, выпускниклери да шахарны социал-экономика эмда маданият ёсюмюне тыйыншлы юлюш къошханлай турадыла. Къарачай шахар республиканы илму-окъуу, джаш тёлю аралыгъыды. Ол себебден, Къарачай-Черкесияны эмда Къарачай шахарны башчылыгъына шахарны айнытыу ишде джетишимле теджейме… - деб чертгенди Ёзден улу.
Шахарны 95-джыллыгъы бла джыйылгъанланы Къарачай шахар округда Къазауатны эмда урунууну ветеранларыны советини председатели Алийланы Ракай, Къарачай шахарны 3-чю номерли орта школуну орус тил бла литературадан устазы Татьяна Мартынова да алгъышлагъандыла.
Къууанч джыйылыуну кёзюуюнде, кёб джылланы билим бериу санагъатда джетишимли уруннганлары, Къарачай шахарны ёсюмюне уллу юлюш къошханлары ючюн Элкъанланы Дарикогъа, Сейитни къызына, Дотдайланы Люазагъа, Аубекирни къызына, спорт санагъатда джетишимлери ючюн РФ-ны махтаулу тренери, СССР-ни эркин тутушдан спортну устасы, КъЧКъУ-ну спорт дисциплинала кафедрасыны доценти Джанкетланы Эреджепни джашы Азретге «Къарачай шахарны сыйлы адамы» деген ат берилгенди.
Андан сора шахарны мэри Орусланы Марат, Къарачай шахар округну ёсюмюне уллу юлюш къошханлары эмда джамагъат ишлеге тири къошулгъанлары ючюн, «Карачаевский пивзавод» ЗАО-ну баш директору Текеланы Русланнга, «ДЭП №162» ОАО-ну баш директору Темрезланы Хасаннга, «Гермес» ООО-ну баш директору Ижаланы Аликге, Теберди шахарда орналгъан «Нарат» санаторийни баш врачы Байчораланы Борисге, «Флора Кавказа» ОАО-ну баш директору Къочхарланы Тимургъа Къарачай шахар округну администрациясыны атындан Бюсюреу къагъытла бергенди.
Къууанч джыйылыу республиканы белгили джырчыларыны концерти бла тамамланнганды.

САЛПАГЪАРЛАНЫ Умар.