«Машук-2017» деген форумну майданында «АртМашук» деб регионла арасы культура бла искусствону джаш тёлю байрамы башланнганды. Анга Къыбыла Россияны окъуу учреждениелерини келечилери къошулгъандыла.
Къарачай-Черкес Республиканы джаш тёлюсю да бу уллу форумдан бир джанында къалмагъанды. Бизден баргъанла белгили актёр Анатолий Журавлёв эмда хореограф Марио Форелли «История успеха» деген ат бла бардыргъан ушакъгъа къошулгъандыла.
Айтыргъа, Шимал Кавказ эмда Къыбыла федерал округладан 800-ге джууукъ студент бла сохта келгенди бу форумгъа.

Россия Федерацияны культура министри Владимир Мединский джиберген алгъышлауну да окъугъандыла джаш тёлюге.
- Бу форумну магъанасы бек уллуду. Къралны ёсюм джолун белгилеген ишлени бирине санаргъа боллукъду аны. «АртМашукну» юсю бла кёб фахмулу джаш адам кесин кёргюзюрге мадар табхан бла бирге, сынам бла да алмашынырыкъды, - деб айтылады анда.
Бу джаш тёлю форумда джаш адамлагъа мастер-классла да кёргюзюллюкдюле.