Абыстол (ноябрь) ай Къарачай-Черкесияны халкъларыны эслеринде бушуу кюнню эсгертген, аны бла байламлы ишлени кёз аллынга келтирген айча алай джашайды. 1943-чю джыл ол айны 2-де къарачайлыла туугъан, джашагъан джуртларындан шкокну тюбюнде зор бла кёчюрюлгендиле. Миллетлиги ючюн репрессиягъа тюшген, «этническая репрессия» деген къыйынлыкъны сынагъан Шимал Кавказда биринчи ала болгъандыла.

Уллу Ата джурт къазауат тамам къызыугъа кириб, къарачай миллетни мингле бла уланлары фронтда кёзюуде законнга, адамлыкъгъа келишмеген буйрукъгъа, адамланы сау 14 джылгъа джуртларындан айыргъан къаты приказгъа, къол салыннган эди. Ол 14 джылны ичинде сюргюнде башына эркинлиги болмагъан миллет ачлыкъ, джаланнгачлыкъ, учузлукъ, ауруу, ёлюм да кёрюр ючюн къалмагъанды. Аланы ызларындан депортациягъа чеченлиле, ингушлула, малкъарлыла да тюшгендиле, репрессияны ауур чархы дагъыда кёб миллетни, социал къауумланы теблеб ётгенди. Ол джыллада джутулгъанланы, джаны саулай джаханим азаб чекгенлени эсгере, алагъа хурмет эте, баш иебиз.
Не тюрлю къыйынлыкъгъа да чыдай, андан хорлам бла чыгъа келген ата-бабаларыбыз бизге баш затны – бириге билиуню – осият этгендиле. Джетген кюнде джарсыуну онглагъан, урушда, урунууда да хорлаб, алгъа таукел барыугъа джол ачхан кюч олду. Ёмюрледен келген ол шартыбызны биз да унутурукъ тюлбюз.
Миллетибизни сакълагъан уллу тёлюлеге биз разылыгъыбызны халал урунууубуз бла, ашхы адетлерибизни, джорукъларыбызны, тин байлыгъыбызны сакълагъаныбыз бла, ызыбыздан келлик тёлюлеге рахатлы джашау къояр ючюн, биргелей джуртубуз Эресейни джашнатыр ючюн, къаджыкъмай кюрешгенибиз бла билдирликбиз.

Къарачай-Черкес Республиканы Башчысы
Темрезланы Рашид

Къарачай-Черкес Республиканы Халкъ
Джыйылыууну (Парламентини) Председатели
Иванов Александр
Къарачай-Черкес Республиканы
Правительствосуну Председатели
АРГУНОВ Мурат.