Эресей Федерацияны Президенти Владимир Путинни Указы бла РФ-ны ФСБ-ны КъЧР-де Чекчи управлениесине тамадагъа генерал-майор Самороков Андрей Георгиевич салыннганды.

Бу кюнледе РФ-ны ФСБ-ны Чекчи къуллугъуну кадрланы хакъындан управлениесини тамадасы генерал-майор Сергей Стрельников КъЧР-де Чекчи управлениеге тамадагъа джангы салыннган Андрей Самороковну республиканы башчылыгъына тюбетгенди.
Тюбешиуде КъЧР-ни Халкъ Джыйылыууну (Парламентини) Председатели Александр Иванов, КъЧР-ни Правительствосуну Председатели Мурат Аргунов, КъЧР-ни Башчысыны эмда Правительствосуну Администрациясыны тамадасы Мурат Озов бизни республикада Чекчи управлениеге башчылыкъ этерик адам бла танышхандыла.
РФ-ны ФСБ-ны Чекчи къуллугъуну кадрланы хакъындан управлениесини тамадасы генерал-майор Сергей Стрельников, Андрей Самороковну сынамлы тамада болгъанын, Ленинград областда, Узакъ Кюнчыгъышда джууаблы къуллукъланы толтуруб тургъанын черте, бизни республикада да кърал чеклени сакълау бла байламлы анга салыннган борчланы мийик дараджада толтурлугъуна базгъанын айтханды.
Сергей Стрельников Къарачай-Черкесияны башчылыгъына, Чекчи управление бла къысха байламлылыкъ джюрютюб, керек кёзюуде кёлтюргючлюк этиб тургъаны ючюн, разылыгъын айтханды. РФ-ны ФСБ-ны КъЧР-де Чекчи управлениесини алгъыннгы тамадасы Юрий Александрович Кудрявцевге да ашхы къуллукъ этгени ючюн бюсюреу этгенди.
КъЧР-ни Халкъ Джыйылыууну (Парламентини) Председатели Александр Иванов да республиканы Башчысы Темрезланы Рашидни эмда тамада къауумну атындан Юрий Кудрявцевге бизни регионда рахатлыкъны сакълаугъа уллу юлюш къошханы ючюн махтау салгъанды.
«Бизни республика къонакъбайлыкъ этерге сюйген келишиулю регионду. Бурундан да чекчиле бла джергили джамагъат шохлукъ джюрюте келеди, кърал чеклеге да адамла аскерчиле бла бирге сакъдыла.
Чекчи управление да Къарачай-Черкесияны джамагъат джашаууна тири къошулгъанлай тургъанды. Джангы тамада да ол адетлерибизни бузмазына ышанама. Биз мындан ары да Чекчи управлениени социал джарсыуларына къарагъанлай, РФ-ны чеклерин бегитиуге, джарашдырыугъа къошулгъанлай турлукъбуз», - дегенди Александр Иванов.

 
{jcomments}