РФ-ны Президенти Владимир Путинни башламчылыгъы бла Президент грантланы фонду кёлтюргючлюк этиб, аскер кемизлилени «ВоИн» атлы Бютеуэресей джамагъат бирлешлиги «Мы живые» деген проектни толтурады.


Ол проектни тамалында аскер къуллукъну толтура тургъанлай саулукъларына уллу заран джетиб кемизли болгъан адамлагъа, аланы юйдегилерине болушлукъ этиледи. Ма бу кюнледе да бизни республиканы Правительствосунда аскер кемизлиле бла уллу джыйылыу къуралгъан эди да, анда алагъа ноутбукла бергендиле.
Къууанч халда къуралгъан джыйылыуда аскер кемизлиле бла КъЧР-ни Правительствосуну Председателини орунбасары Гербекланы Ирина, КъЧР-ни Халкъ Джыйылыууну (Парламентини) илмуну, билим бериуню, маданиятны, спортну, джаш тёлю ишлени, туризмни хакъындан комитетини председатели Алексей Ганшин, КъЧР-ни Башчысы бла Правительствосуну джорукъ сакълагъан органла, сауутлу ведомствола эмда урушлагъа къошулгъанла бла иш джюрютген управлениесини тамадасы Рустам Мижев, «Бирикген Эресей» политика партияны КъЧР-де регионал толтуруучу комитетини тамадасы Джамбаланы Руслан, республиканы урунуу бла социал ёсюмню хакъындан министри Руслан Шаков, аскер комиссарны орунбасары Владимир Скоморох, Бютеуэресей Халкъ фронтну толтуруучу комитетини КъЧР-де регионал бёлюмюню тамадасы Каппушланы Людмила тюбешгендиле.
Къонакълагъа джылы тюбеб, информацион техника керекле берген заманында Гербекланы Ирина: «Къралыбызгъа тыйыншлы къуллукъ эте, аскер борчларын мийик дараджада толтургъан, талай джылны узагъына кёб миллетли Къарачай-Черкесияда рахатлыкъны сакълаугъа уллу юлюш къошхан хурметли джердешлерибизге саугъаланы сюйюб береме.
Бу саугъала урушлагъа къошулгъан ветеранлагъа социал эмда джамагъат джашауларын тири бардырыргъа джарарыкълары хакъды.
Ноутбукла бла хайырлана, аскер кемизлиле социал сетледе бир-бирлери бла байламлылыкъ джюрютюрге, власть органлагъа сорууларын берирге, онлайн халда джумушларын баджарыргъа боллукъдула», - дегенди.
Аскер комиссарны орунбасары Владимир Скоморох да Афганистанда, Шимал Кавказда урушлагъа къошулгъан ветеранлагъа разылыгъын билдире, Украинада спецоперация бардырыла тургъан кёзюуде ала кеслерини юлгюлери бла ёсюб келген тёлюню патриот ангысын ёсдюрюуге ёлчемсиз юлюш къошханларын черте, уллу бюсюреу этгенди.

 
{jcomments}