Ал джыллада, хаджиликге барабыз деб, кърал чекни ётерге излеген адамла тюрлю-тюрлю чурумла бла джунчуб айланнганлары амалтын, РФ-ны ФСБ-ны КъЧР-де управлениеси быйыл Сауд Арабиягъа бара тебреген джердешлерибизге джарарыкъ хапарны бергенди.
РФ-ны 1993-чю джыл арттотур (апрель) айны 1-де чыкъгъан «О Государственной границе Российской Федерации» деген 4730-I-чи номерли федерал законуна кёре, адамланы, транспортну, джюкню, хайуанланы чекден ётдюрюр ючюн, алагъа къралдан чыгъаргъа неда кирирге берилген эркинлик къагъыт керекди.
Хаджиликге тебреген адамны биргесине Сауд Арабияны визасы бла болджалы чыкъмагъан тыш къраллагъа барыргъа берилген паспорту болургъа керекди. Аны бла бирге РФ-ны адамы болгъанына паспорту бла туугъанына шагъатлыкъ этген свидетельствосу да болса тыйыншлыды.
Тиширыула биргелерине «тышына чыкъгъанларына» шагъатлыкъ этген свидетельстволарын да алыргъа керекдиле. 45 джыл толмагъан тиширыу хаджиликге кеси джангыз баргъан адет джокъду. Аны бла къысха джууукъ джетген эркиши да барыргъа керекди. Аланы биргелерине джууукълукълары белгиленнген документлери да болургъа керекди.
Биргелерине акъыл-балыкъ болмагъан сабийлени алгъанла уа документлерин «О порядке выезда из Российской Федерации и въезда в Российскую Федерацию» деген федерал законнга кёре хазырларгъа керекдиле. Ол федерал законнга кёре акъыл-балыкъ болмагъан сабийни тыш къралгъа атасыны-анасыны бири бла неда аны кесине бала этген адам бла, эмда болмаса осуйлукъ этген адам бла барыргъа болады.
Аланы бири бла акъыл-балыкъ болмагъан сабий джолгъа чыгъар ючюн, аны биргесине нотариус джарашдыргъан, ким бла, къайры баргъаны, анда къаллай бир турлугъу джазылгъан къагъыты болургъа керекди. Къагъытлары тыйыншлысыча джарашдырылмагъан сабийни кърал чекден ары-бери да иерик тюлдюле.
Тыш къралда киши «илинмез» ючюн, хаджиликге баргъан муслиманланы биргелерине полиомиелит бла гриппден прививкала этилгенлерине сертификатла да керекдиле.
Коронавирусну кёбчюлюкге джаймаз ючюн, ала Роспотребнадзор теджеген джорукъладан да таймазгъа борчлудула.
Джолгъа чыгъарны аллы бла Сауд Арабияны коронавирусха къаршчы тыйгъычлары бар эселе, аладан да хапарлы болсала игиди.
Тыш къралгъа тебрегенле, къайда болса да бир тёлеулери чыгъыб, чекден ётерге эркинлик берилмей къалмаз ючюн, борчларын тёлерге керекдиле.
Сауд Арабиягъа ички, тонгуз эт къошулгъан продуктала, наркотикле къошулгъан дарманла, аны кибик башха затла ётдюрюрге болмайды. Амалсыз керекли врач джазгъан дарманны биргесине алгъан адам, рецептин да кёргюзюрге керек боллукъду.
Хаджиликге баргъанла бары анда алагъа саугъагъа берилсе да, кеслерини кёзлери къараб алабыз деселе да, РФ-ны джерине киргизирге джарамагъан затланы келтирирге болмазлыгъын билсинле.
Чекден ётген заманларында дин экстремизм бла байламлы литература кимде болса да табылса, ол адам кеси да апчырыкъды, башхалагъа да артда хаджиликге барыргъа тыйгъыч салынныкъды. Аллай затланы эсгериб, сакъ болугъуз! Ашхы джолгъа барыб, къууанч бла юйюгюзге къайтыгъыз!
Сауд Арабияда документин тас этген адам эрлай огъуна джергили полиция бёлюмге барыб, къагъыт джазаргъа, РФ-ны консульствосуна да хапарын билдириб, ызына къайтыргъа къагъыт алыргъа керекди.
Хаджиликге барыб, къаллай болса да бир чурум бла джунчугъан муслиман РФ-ны Меккяда хадж-миссиясында неда РФ-ны Джидда шахарда Баш консульствосунда болушлукъ табарыкъды. Аны адреси: Saudi Arabia, Jeddah 21454, P.O. BOX 15786, Al-Andalus str., 14; телефон: (8-10-966-2) 665-92-12; (8-10-966-2) 665-92-55; факс: (8-10-966-2) 665-92-32; e-mail: Этот адрес электронной почты защищён от спам-ботов. У вас должен быть включен JavaScript для просмотра..).
