Таулу джуртум, джандет джуртум
Къарачай,
Бюгюнлюкде келди санга энтда бир май

Табигъатха джан салады ол къучакълай,
Миллетиме эки кере багъалы ай.

Джуртубузгъа джолну ачхан огъурлу май
Киши бизни аллыбызны тыялмай,
Бек кёб ариу айтсала да тынгыламай,
Таулу халкъым атланнганды джуртха алай.

Бурун, тюе джыйынлача, эшелонла,
Кюн чыкъгъаннга джолну тутуб бара ала,
Сакълай элле тансыкъ болуб бизни таула,
Джыламукъча, таза чыкъгъан къара суула.

Миллетими кими тепсей, кими джырлай,
Бары бирден ёре туруб суу къобханлай.
Аны ючюн багъалыды бизге бу ай,
Джашарыкъды ёмюрледе унутулмай.

Келген эдик джуртубузгъа къучакъ кериб,
Джюрекледен джылы салам хар ким бериб,
Киши джуртну алтынындан сыйлы ташы
Анда аны балындан да тузу татлы.