Алыб гокка хансланы къучагъына,
Эшелоннга тюбеди 3-чю Май.

Термилиб онтёрт джылны узагъына,
Ёмюрлюк Джуртуна къайтды Къарачай.

Бир къарт тюшдю вагондан, ашыгъыб,
Къарайды,бек тансыкълаб, тегерекге…
Эсине тюшюрюб мында джашлыгъын,
Излейди Минги Тауну чууакъ кёкде.

Мычымай барды Къобанны бойнуна,
Къабланыб ичеди аны таза сууун.
Уппа этиб,ташын алды къойнуна,
Кетерликча онтёртджыллыкъ бушууун.

Сюйюнюб атлайды Туугъан джеринде,
Къарайды тауларыны келбетине.
Джангыдан джашлыкъ келиб джюрегине,
Къууанады сау къайтхан миллетине.

Къалгъанла да чыкъдыла вагонладан:
Унутдула зор джылланы, айланы.
Той башланды,башланды тюзлюк заман,
Ол кюн болду Къарачайны байрамы.