Ётген ыйыкъда Черкесскеде, Басманы юйюнде, миллет тилледе чыкъгъан эки китабны презентациясы болду.

Аны къурагъан республикан китаб басма эди. Быйылны планына, сёз ючюн, къарачай тилде чыгъарыкъ талай китаб салыныбды да, аланы бири Ёзденланы Альбертни «Акътёш» деген китабыды. Башында сагъынылгъан китабланы бири олду. Экинчиси абаза джазыучу Шхаева Екатеринаны «Мгновения жизни» деген юбилей китабы эди.
Презентациягъа кърал, джамагъат къуллукъчула, джазыучула, устазла, журналистле, тюз окъуучула чакъырылгъан эдиле.
Алгъы бурун китаб басманы директору Боюнсузланы Роза китаб чыгъарыу бла байламлы этилген, энди этиллик ишледен, бюгюнлюкде тюбеген джарсыуладан да къысха хапар айтды. Ызы бла КъЧР-ни миллет ишлерини, кёбчюлюк коммуникацияла бла басманы министрини биринчи орунбасары Хубийланы Ислам, ол министерствону атындан бу ишни къурагъанлагъа бюсюреу-сыпас эте, бу ашхы адетни джангыртханы ючюн китаб басманы директору Боюнсузланы Розагъа разылыгъын билдирди, авторлагъа джылы сёзле айтыб, чыгъармачылыкъда уллу джетишимле теджеди. Ёзденланы Альбертни китабын окъуб чыкъгъаны себебли, къысха халда сюзюб, уллу багъа бере, миллетни асыл шартларын, адеб-намыс кючюн, халкъ кери ургъан джаман затла бла кюрешин да автор таб кёргюзе билгенин чертди. Къысха хапарлада, китабха салыннган бирси чыгъармалада миллет колоритибизни юсю бла бютеу адам баласына бирча багъалатхан инсанлыкъ шартла, гуманист иннет ачыкъланнганларын айтды Хубий улу Ислам.
Презентацияда Къарачай-Черкес кърал университетни устазы, профессор Пазов Сергей, республикада Джазыучуланы союзуну абаза секциясыны башчысы Шебзухова Лариса, кърал, джамагъат къуллукъчу Тоторкъулланы Шагъабан, алим Боташланы Фатима, журналист Къоркъмазланы Салима эмда башхала сёлешдиле.

Ёзденланы Якъуб.