Ишсиз адамланы эмда джабыла тургъан предприятиеледен кетерге керек болуб тургъан ишчилени иш бла баджаргъанлагъа быйыл кърал болушлукъ этиледи.
Эресей Федерациягъа санкцияла салыннганы бла байламлы бир къауум предприятиеле джабылыб ишсизле кёб болгъан кёзюуде урунууну рыногунда къолайсыз болумну игилендириб, социал-экономика болумну тыйыншлы дараджада тутар ючюн, къралны башчылыгъы къошакъ мадарла къурагъанды. Ол мадарла Эресей Федерацияны Правительствосуну быйыл алтотур (март) айны 18-де чыкъгъан 409-чу номерли бегимине тюшюрюлюб, адамланы иш бла баджарыугъа себеблик этерик мадарланы толтурургъа джоралаб федерал бюджетден къралны субъектлерини бюджетлерине ахча джибериуню джорукълары белгиленнгендиле.
Ол бегимде джазылгъаннга кёре:
1. Эсебде тургъан ишсизлени джамагъат джумушланы баджарыугъа къошуб, хакъ тёлеген тамадалагъа, алагъа тёлеген айлыкълары ызына къайтарыллыкъды. Алай этер ючюн, алгъа иш бергенле кеслери «Работа в России» деген цифра платформада эсебге тюшерге, предприятиесинде къаллай бош иш орунла болгъанларыны юсюнден хапар берирге, джумушларын баджарыргъа джарарыкъ усталаны сайлар ючюн, заявка берирге да керекдиле.
2. Къыйын болумда ишден къысталыргъа джетиб тургъанланы бир болджалгъа дери иш бла баджаргъан, аланы иш орунларында материал-техника кереклени джарашдырыргъа джоюм этген тамадалагъа да ол адамла бла байламлы этген джоюмлары ызына къайтарыллыкъды.
Бу мадар бла башха амалы болмай предприятиесинде иш заманны къысхартхан, бир болджалгъа ишин тохтатхан неда ишчилерин ачха тёленмеген отпускагъа джиберген тамадала, ишчилерин джарсытмазгъа амал излеген хапарларын «Работа в России» деген порталгъа салыб, хайырланыргъа боллукъдула.
3. Эте билген ишлери тыйылыб, ишсиз къалыргъа джетиб тургъанланы башха усталыкъ алыргъа джиберген тамадалагъа да ишчилерини усталыкъларын ёсдюрюуге этген джоюмлары ызына къайтарыллыкъды.
Бу мадар бла промышленность чыгъарыу бла кюрешген предприятиеледе иш заманны къысхартхан, бир болджалгъа ишин тохтатхан неда ишчилерин ачха тёленмеген отпускагъа джиберген тамадала, ишчилерин джарсытмаз ючюн, джангы усталыкъ алдырыргъа излеген хапарларын «Работа в России» деген порталгъа салыб, хайырланыргъа боллукъдула.
Кърал кёлтюргючлюк бла хайырланыр ючюн, иш бериучю тамада къауум Джамагъатны иш бла баджаргъан аралыкъ баямлагъан конкурс сайлаулагъа заявка берирге керекди.
Эресей Федерацияны Правительствосуну 2021-чи джыл алтотур (март) айны 13-де чыкъгъан «О государственной поддержке в 2022 году юридических лиц, включая некоммерческие организации, и индивидуальных предпринимателей в целях стимулирования занятости отдельных категорий граждан» деген 362-чи номерли бегимине кёре, 2022-чи джыл РФ-ны Социал страхование фонду предприятиелеге да, кеслери табышлылыкъ бла кюрешгенлеге да, адамланы иш бла баджарыр ючюн, этген джоюмларын субсидия халда къайтаргъан этеди.
Аллай субсидияла 30 джылы толмагъан, усталыкъ алыб чыкъгъанындан неда аскер къуллугъун тауусуб къайтханындан сора 4 ай озгъан, башха джукъда ишлемегени эсебге тюшюрюлген ишсизни, кемизлини, усталыгъы болмагъан джаш адамны, акъыл-балыкъ болмагъан сабийли атаны-ананы, ёксюзню, тутмакъдан чыкъгъанны иш бла баджаргъан тамадала алыргъа боллукъдула.
Бу мадар бла хайырланыргъа излеген тамадала да «Работа в России» деген порталда заявка берирге керекдиле.
КУМУКОВ Хизир,
КъЧР-ни джамагъатын иш бла баджаргъан управлениени тамадасы.
