Бу кюнледе редакциягъа Черкесск шахарны 5-чи номерли орта школуну тарихден устазы Копсергенова Залина Мухарбиевнадан письмо келгенди.
«Багъалы редакция! Туугъанындан бери ауругъанчыгъы болгъан, Московский посёлокну 4-чю номерли гимназиясында окъугъан Кенжев Марат деб бир фахмулу джашчыкъны таныйма мен. Санларын эркин къымылдатыр мадары болмаса да, къыйын джашаууна бой бермей, Марат фахмусу джетген затла бла кюрешеди. Ол сейир назмула, хапарла джазады.
Мадар бар эсе, республикабызда эм кёб окъуучусу болгъан «Къарачай» газетде ол джашчыкъны юсюнден бир статья чыгъарсагъыз, аны кёлю джарыр эди, мындан ары да учунур эди», - деб джазады Копсергенова Залина.
Хурметли устазны тилегин къабыл этер ючюн, Марат Кенжевни джашауундан кесибиз толу хапарлы болуб, фахмулу джердешибиз бла окъуучуланы шагъырей этерге излейбиз.
Кенжев Марат 2006-чы джыл аууз-герги (октябрь) айны 28-де туугъанды. 10 джылында назмула джазыб башлагъанды. Ал джыллада джазгъан назмуларын ол кишиге да кёрмюзмей джыйыб баргъанды.
Джашаууну сынаулары асыры ауурдан ол, бёлек заманны кеси къайгъылы болуб, джазгъанны да тохтатханды. Алай а, джаш адамны энчи сезимлери къаламын къолгъа алдыргъандыла. Алай бла Марат 2020-чы джыл джангыдан назмула джазыб башлагъанды. Ол кёзюуде тамам таралыб джазгъан чыгъармаларын «Горький вкус» деген белгили джырны джырлаучу Султан Лагучев кёргенди. Ол Маратха социал сетледе аккаунтла ачыб, джазгъан назмуларын алада баямлай турса, аны фахмусундан башхала да хапарлы боллукъларын эсгертгенди. Султан аны назмуларына макъам салыб джырларгъа боллугъун айтханында, Марат кеси сахнагъа чыгъаргъа да излегенди. Алай а, ол миллетни аллында джырларгъа таукел болалмагъанды.
Ол кёзюуледе Амир Хаов да, аны «Без неё завянут розы» деген назмусуна макъам салыб, джырлаб тебрегенди.
Бусагъатда Маратха 15 джыл болгъанды. Ол алкъын джаш болса да, аны къаламындан 2 хапар, 20-дан аслам назму, 10 джыр чыкъгъанды. Кавказны белгили артистлери Маратны 3 джырын джырлайдыла, къалгъан джырларына да аранжировка этиле турады.
«Магомед Дзыбовну бир бек джаратама. Мени джырларымы аныча артистле джырлагъанларына бек къууанама», - деб хапар айтады Марат.
Марат Кенжев не джаны бла да билимин ёсдюрюрге тырмашады, политикадан да хапарлы болгъанлай турады, футболну да бек сюеди. «Спартак» командагъа джан аурутады.
Марат быйыл 9-чу классны бошай турады да, устазла аны джетишимли окъугъанын чертедиле. Кеси айтхандан, ол джазгъанын да тохтатмагъанлай, программистликге окъур муратлыды. Мадар табса, джырлагъа аранжировка этерге юренирге да излейди. Аллах буюрса, аны ол муратлары толурла.
Мурат Кенжев кесича инджилген сабийлени аурууларына бой бермезге чакъырады. «Ауруйма деб, ким болса да джазыкъсынырын сакълаб турургъа керек тюлдю. Сёз ючюн, хар адам да джетишимли спортчу болуб баралмайды. Башхалача къымылдар мадарыбыз джокъ эсе, къолубуздан келгенни этерге, болумубуз, фахмубуз джетген бла кюреширге керекбиз», - дейди ол.
Бу сабийни кёрген, билген бир джукъ бла болушургъа, кёлюн джарытыргъа излейди. Биз да хурметли устазыны - Копсергенова Залина Мухарбиевнаны - башламчылыгъы бла Маратны хапарын басмалаб, быйыл, Къарачай-Черкесияда Кемизлилени джылы деб баямланнган джыл, быллай сабийлеге айырыб эс бёлдюрюрге излейбиз. Ол нюзюр бла, джаш поэт Кенжев Маратны «Джюрек сюймеклик» деген назмусун къарачай-малкъар тилге кёчюрюб, «Къарачай» газетни окъуучуларына теджейбиз.
ДЖЮРЕК СЮЙМЕКЛИК
Сюймекликге джыр джазаргъа бек излеб,
Сёзлериме тизгинлени этиб кеб,
Кюрешеме. Халкъ джырыма къалай дер?
Къолайсыз... - дер биреу, башха: къолай... - дер.
Мен кесиме излемейме сый, махтау,
Берлигин бергенди меннге бу джашау...
Адамлыгъы болгъаннга мен - «акъылман»,
Шайтан кёллю кюле болур ызымдан...
Болумуча багъа беред хар инсан.
Биреу санындан кем, биреу - башындан.
Бир джаннга да дау салмайын джашаргъа
Кюрешеме, ашхылагъа ушаргъа.
Учхара сёз айтыб ийсем, кечсинле,
«Хо-хо, алкъын джаш адамды...» - десинле.
Эсли къауум меннге тюз дерс берсинле,
Джюрегимде ийнамымы керсинле.
Тюл эсе да фахмум бютюн сейирлик,
Мен халкъыма берлик - джюрек сюймеклик.
ТЕШЕЛЛЕУЛАНЫ Зульфия.
