Арттотур (апрель) айны 20-да КъЧР-ни Башчысы Темрезланы Рашид РФ-ны Президентини КъЧР-де приёмныйинде адамла бла тюбешиу бардыргъанды.
Республикада джашагъанла Башчыгъа инженер эмда социал инфраструктураны айнытыуну, джамагъат кёб барыучу джерлени джарашдырыуну дагъыда башха затланы юслеринден соруула бергендиле. Аланы хар бирине тыйыншлысыча къаралыб, оноу этилгенди.
Сары-Тюзде джашагъан биреулен элни таза суу бла баджарыуну юсюнден соргъанды. Темрезланы Рашид айтхандан, 2022-чи джыл Сары-Тюз элни суу бла баджаргъан объектни къурулушун башлар мурат барды. 20,6 километр узунлугъу болгъан объектни къурулушу быйылны ючюнчю кварталында тамамланныкъды.
Абаза районну Псыж элинде джашагъан тиширыу элни джангы тийресинде кесини юйюне газ тартыргъа болушлукъ тилегенди. Республиканы Башчысы айтхандан, «Социальная догазификация» деген проектни толтурууну тамалында 2022-чи джыл къыркъар (август) айны 1-не дери тиширыуну тилеги къабыл этилликди. Быйыл Псыжда газ берген сетни эмда узунлугъу 4 000 метр болгъан газ быргъыны къурулушлары бардырыллыкъдыла.
Черкесск шахарны 6-чы номерли орта школунда окъугъан сабийлени бирини атасы 650 сохтагъа орну болгъан школ ремонт керекли болгъанын билдиргенди. Бюгюнлюкде ол школда 1171 сабий окъуйду. Темрезланы Рашид чертгенден, 2023-чю джыл ол школгъа къошакъ мекям ишленникди, школну эски мекямына да тамамлы ремонт этилликди.
Ючкекен элде джашагъан тиширыу: «Район библиотеканы бусагъат заманны излемлерине кёре джарашдырыр (модельный библиотека этерге) мадар бармыды?» - деб соргъанды. КъЧР-ни Башчысы аны соруууна джууаб бере, районну Джарыкълыкъ юйюню мекямында орналгъан библиотека джангы окъуу джылгъа джангыртыллыгъын билдиргенди. Ол иш «Маданият» деген миллет проектни «Культурная среда» деген регионал проектини тамалында бардырыллыкъды.
Зеленчук районда джашагъан биреуленни Зеленчук станседе физкультура-саулукъ сакълау комплекс ишлеуню юсюнден соруууна Темрез улу быллай джууаб бергенди: «Быйыл станседе физкультура-саулукъ сакълау комплексни къурулушу башланныкъды. Ол эки этажлы мекям боллукъду, кеси да 938 квадрат метр джерни аллыкъды. Анда спортну талай тюрлюсю бла кюрешир мадар къураллыкъды». Республиканы Башчысы джууаблы къуллукъчулагъа Зеленчук станседе бассейн ишлеуню юсюнден соруугъа къараргъа да борч салгъанды.
Черкесск шахарда джашагъан тиширыу республикан аралыкъда орналгъан кёб фатарлы юйлени бирини арбазын джарашдырыргъа кереклисин билдиргенди. Темрезланы Рашид «Формирование комфортной городской среды на территории КЧР» деген регионал проектни толтурууну тамалында къыркъаууз (сентябрь) айны 1-не ол юйню арбазын джангыртыргъа буйрукъ бергенди. Бютеулей да 2022-чи джылны аягъына республиканы шахарлары бла районларында 50 арбаз джарашдырылгъанды.
«Уруп элде фельдшер-акушер пункт ишленир мадар бармыды?» - деб соргъанды элде джашагъанланы бири. КъЧР-ни Башчысы айтхандан, «Модернизация первичного звена здравоохранения Карачаево-Черкесской Республики» деген регионал программаны тамалында элде фельдшер-акушер пунктну къурулушун башлар мурат барды.
Республиканы Башчысы Темрезланы Рашид чертгенден, тюбешиуню кёзюуюнде берилген буйрукъла къалай толтурулгъанларын эсебде тутарыкъды.
