Быйыл хычаман (май) айны 3-де халкъыбызны кёчгюнчюлюкден Минги Тауну этегинде орналгъан тарих джуртуна къайтханына 65 джыл толады.

Мингле бла джылланы джашагъан джеринден зор бла кёчюрюлюб, Орта Азия бла Къазахстанны исси къум тюзлерине тёгюлген миллетибиз, кёб адамындан, 22 минг сабийинден айырылса да, тилин, динин, адетлерин, намысын, адамлыгъын, халаллыгъын сакълагъанды. Бютюн да халкъ ышанмакълыгъын тас этмегенди – ол зат анга алгъа къараргъа, тюзлюкню орнуна салыр ючюн кюреширге болушханды.

Халкъыбызны онглу адамлары кёчгюнчю миллетлени ичлеринде биринчи болуб Москвагъа джол салгъандыла. Экинчи делегация, Совет Союзну башчысы Н.С. Хрущёвгъа тюбеб, туугъан джуртха къайтыргъа эркинлик тилегенди. Ол адамланы кючлери бла кёб бармай депортациягъа тюшген халкълагъа реабилитация этерге бегим алыннганды. Халкъыбыз ол джигит, ётгюр адамларын ёмюрде да унутурукъ тюлдю. Аланы атлары алтын харифле бла тарихибизге джазылгъандыла.

Хычаман айны 3-сю къарачай халкъны миллет байрамыды, 14 джылны термилген таурухлу джуртуна къайтхан сыйлы кюнюдю. Аны бла байламлы материалланы басмалаб башлайбыз.

Энди, къарачай халкъ къой эсенг, дунияда бир миллет да быллай зорлукъну сынамасын. Кёчгюнчюлюкде ёлгенлерибиз джандетли болсунла, сауларыбызгъа Аллах саулукъ-эсенлик берсин. Уллу Эресей къралыбызда тюзлюкню байрагъы чайкъалгъанлай турсун.