Бурун заманда джаш, эки-юч нёгер да алыб, къызны юйюне къонакъгъа тюшюб, ала да джаш-къыз джыйыб, той-оюн этиб, ашатыб, ичириб, алай бла джаш къызны кёрюб, танышыб, къызны адамлары да джашны кёрюб, сынаб, андан сора арада келечиле джюрюгендиле.

         Бир къызны кёре, джашла келгендиле. Къыз бир кесек чарт-гуртуракъ къыз болгъанды да, адамлары къоркъгъандыла: джаш аны алайлыгъын эслесе, джаратмай кетер деб. Сора къызгъа былай юретгендиле: сёлешмезге кюреш къонакъла болгъан заманда; асыры намыслыдан, уялыб сёлешмейди дерле да къоярла, ансы, серинге урдуруб палах зтерсе, джукъ айтама десенг. От эте, от аллында чёк да тур.

         Къонакъла келгендиле. Чабышыб къонакълыкъ эттендиле. Отха къазанла асхандыла. Къыз да, айтханларыча, отджагъада олтуртуб, сёзге-башха къошулмай, отха отун атхан кибик эте тургъанды. Бир заманда шхууур бишгенди да, чоюндан этлени чыгъара башлагъандыла. Аны кёргенлейине, къыз, ач болуб тургъаны бла, тёзалмай, секириб ёрге къобханды.

         «Эй, бу бир ишленнген къыз болуб, бизни сыйыбызны кёрюб къоба тургъанлыгъыды», — деб джашланы кёллерине алай келиб:

         — Къобма, къыз, къобма, къыйналма, сыйлы бол, олтур! — дегендиле.

         Къыз, бурулуб джашлагъа къарагъанды да:

         — Хо бир да, сизни атагъызны джаны ючюн, сизге къобама дейт бир да! Кёзюме тютюн киргенди да, аны ючюн къобама ансы! — дегенди.

         Ашарыкъ ючюн къобханын джуудургъанлыгъы болгъанды.

                                               СЫЛПАГЪАРЛАНЫ Кулина,

                                                        «Тюшнюу» - 1993 дж.