Мындан алда Къарачай-Черкес Республиканы Башчысы Темрезланы Рашид КъЧР-ни Правительствосуну Председателини орунбасары Евгений Гордиенко бла тюбешгенди.

Ала быйыл джол санагъатда бардырыллыкъ ишлени юслеринден сёлешгендиле. «Безопасные и качественные дороги» деген миллет проектни эмда башха кърал программаланы тамалында 40 километр джолну ремонт ишлери этилликдиле. Черкесскеде джолну бютеулей 13 километр узунлугъу болгъан 27 джери джарашдырылыб айбат тюрсюн аллыкъды.
Бусагъатда джоллагъа къараучула «Черкесск-Исправная-Сторожевая» деген машина джолну 6-чы километринде, Псаучье-Дахе бла Бесленей эллени араларында эмда Черкесскеде Юбилейный орамны эки джеринде ремонт ишле бардыра турадыла.
Аны тышында, джууукъ заманда Къарачай шахарда «Саулукъ» деген стадионну реконструкциясы башланныкъды. План бла бегиленнгеннге кёре, спорт объектни къурулуш ишлери быйыл этилиб бошаллыкъдыла.