Бурун бизни джерледе, тили Минги Тауда буз джаласа, къуйругъу Бештауда чибин къоругъан бир ёгюз, къанатлары кёкню джабхан бир къуш, кюн аманда сакъалыны тюбюне сау сюрюу сыйыннган бир теке да болгъандыла.

Бир джауумлу кюн ол къуш, текени мюйюзюне къонуб, ол ёгюзню ашагъанды. Сюрюую бла текени сакъал тюбюнде тургъан бир джаш, джауум тохтаймыды деб, кёкге къарагъанлай, ёгюзню джауруну, сылджыраб, аны кёзюне тюшгенди. Ол кёзюн уугъанында, джаурун джерге чартлагъанды. Артда, джауруннга джер къозлаб, эл орналгъанды. Бир тюлкю, джаурунну джерден къарагъан къыйырын кемиреме деб, кече сайын элни ары-бери бургъанды. Элчиле, джыйылыб, аны ёлтюргендиле да, бир джанын союб, бирси джанына аудуралмай къойгъандыла. Джангы туугъан сабий болгъан бир къатын урчукъ сабы бла тюлкюню бирси джанына аудургъанды да, терисин сойгъанды. Тюлкюню терисини джарымы сау элге бёрклюк болгъанында, джарымы къатынны джангы туугъан сабийине бёрк къыйыр да чыкъмагъанды.
- Ёгюзден, къушдан, текеден, джашдан, тюлкюден, къатындан, сабийден къайсы уллуду?
- Теке.
* * *
Бир къатын бешикде бир сабийни: «Джукъла, балам, джукъла, балам, Сен джукъламай, ким джукъласын?! Джангыз къызымдан туугъанса, джангыз джашымы баласыса», - деб тебретгенди.
- Сабий къатынны кими болгъанды?
- Ёге джашы бла туугъан къызындан туугъан туудугъу.
* * *
Бир элден бир элге келин келгеннге алгъышха баргъан бир къатын аллына тюбеген бир къызчыкъгъа: «Юйюгюзге чаб да, мени келгеними айт», - дегенди. Къызчыкъ да анга: «Ким келеди дерикме?» - деб соргъанды.
«Ананга - эгечинг келеди де, атанга - келининг келеди де», - дегенди къатын.
- Алай къалай болгъанды?
- Эки эгеч джашы бла атасына барыб тургъандыла.

 
{jcomments}