Этген джумушу бла джамагъатдан разылыкъ табхан дизайнерлени бириди Биджиланы Маликни къызы, Джанибекланы Аминат.
Аны атасы сатыу-алыу бла кюреше, адамлагъа игилик этер джанындан къолундан келгенни этгенлей турады.


Анасы Хубийланы Исмаилны къызы Айшат ашхы адамланы бириди. Анга кёб адам разыды, бюсюреу этеди. Ол Ючкекенде кесини ательесин ачыб, кёб джылланы ишлегенди. Тигерге, бичерге уста адамны къолу неге да джарашханды. Адамны юсюнде кийиминден башлаб, юй турмушда хайырланнган затына дери этгенлей тургъанды. Бусагъатда пенсиядады.
Къызы сабий заманындан анасыны этген ишине къарай, юрене, бу усталыкъгъа сюймеклик анга къан бла сингнгенди.
Аминат Ючкекенде 1984-чю джыл туугъанды, 7-чи номерли орта школну мында джетишимли бошагъанды. Анасыны усталыгъыны джаны бла окъургъа излеб, ол Ставрополда экономика бла управлениени институтуну дизайнер среды деген бёлюмню тауусады. Таулу къыз анда окъугъан 6 джылыны ичинде дизайнер усталыкъдан иги билим алады. Ол студент сагъатында джамагъат ишлеге къошула, конкурслагъа да барыб, атын айтдыргъанды. Джаш уста урунуу джолун Черкесскеде «Рашэ» деген терезе джабыула этген салонда башлайды. Баш дизайнер болуб, сынамын ёсдюре, алайда кёб джангы затха юренеди. Бир джылны ичинде дизайнер джаны бла не тюрлю джумушну да иги толтура, эринмейин кюрешиб атын иги бла айтдырыб, белгили болады. «Рашэ» салонну тамадасы Токаланы Эльвираны анга болушханын, юретиб кюрешгенин ол унутмай, хар заманда джюрек разылыгъын билдиргенлей турады.
Аминатны алайдан «Голден Текстиль» салонну тамадасы, тилеб кесине чакъырады. Таулу къыз ары баш дизайнер болуб барыб, кёб заман да озгъунчу, ишни таб къураб, алайыны атын да айтдырады. Билими, сынамы да тыйыншлы дараджагъа джетгенин ангылагъанында Аминат 2013-чю джыл Черкесскеде Октябрьский орамда кеси энчи салон ачады. Анда да бёлек джыл ишлегенинден сора Первомайский орамгъа кёчюб, «Радуга» деб терезе джабыула этген салон ачыб, бюгюнлюкде алайда ишлейди. Мени бла ушагъында ишини юсюнден ол былай хапар айтады.
- Дизайнер ол тюрлю-тюрлю макетле, предметле, бусагъат заманны халына кёре затла къурагъан адамды. Ол проектни къалай этерге керегини сагъышын этеди, ишин адамны излемине кёре къурайды, суратлау графиканы, чертёжланы мадарлары бла хайырланады. Бир-бирде талай затны этиб, аланы бир-бирине джалгъаб не боллугъуну оюмун этеди.
Биз терезелеге, орунлагъа джабыула, диванлагъа, креслолагъа, шиндиклеге чехолла, тюрлю-тюрлю джастыкъла, джаш адамла келин келгенде, къыз бергенде киерге бек сюйген хазырлары бла къарачай кёлекле, чепкенле, тамгъалары бла суратла, этника темалагъа миллет суратла, келин келген, къыз берген къууанчлагъа тамгъалары бла байракъла, намазлыкъла, мынчакъла, сабий къыз чепкенчикле этебиз. Интерьерле бла да ишлейбиз. Кафелени, ресторанланы дизайнер проектлерин этебиз, материал, мебель сайларгъа болушабыз, башха затларын джарашдырабыз.
Бусагъатда асламысына терезе джабыула бла кюрешебиз. Барыб къараб, суратха алыб, уллулугъун, гитчелигин ёлчелейбиз, ишчибиз карнизле урады. Биз компьютерде неда къолдан эскизле джарашдырабыз. Кесибиз къумачла сайлаб, этерик адамыбызны чакъырыб, анга кёргюзебиз, ол джаратса этебиз, алай болмаса кеси сайлагъан бла ишлейбиз. Тигиб бошагъандан сора, адамларыбыз барыб, салыб, джарашдырыб кетедиле. Хар адам кесини юйюню уллулугъуна, гитчелигине, бёлмелерине кёре сайлайды, заказ береди.
Бизни салонубузда тикген бёлюм ишлейди. Тигиучюлерибиз сынамлары болгъан, кёб джылланы ишлеген адамладыла. Байкъулланы Фарида бла Акова Марина керти усталадыла, къол ишлери бек игиди. Ала 20-дан аслам джылны ишлейдиле. Бусагъатда да тигиучюле бизге келгенлей турадыла, сайлаб сынамлары, билимлери болгъан усталаны алабыз.
Биз бир зат тикген адам, 2-чи, 3-чю кере да келеди, къызларына, джашларына, джууукъ джетген адамларына да айтады. Къыз керек да тигебиз. Къарачай тамгъаланы къолубуз бла суратын этиб, тигиб, рамкагъа салыб джарашдырабыз. Адамла аланы саугъагъа этдиредиле. Гитче эгечим Айзанат миллет темалагъа суратла салады, бу джаны бла не тюрлю затны этерге да бек устады.
Бизге республиканы эллеринден, шахарларындан, Ставрополь, Краснодар крайладан, Ростовдан, Эсентюкден башха джерледен заказ бередиле, келедиле.
Заманны излемине кёре къумачланы, карнизлени, башха затланы кёб тюрлюлери, ариудан ариулары чыгъыб барадыла. Ала бла хайырланыр ючюн, иги билирге керекди. Аны бла байламлы биз каталоглагъа къарагъанлай турабыз, кёрмючлеге барабыз. Ким не зат, къаллай джангы, иги зат чыгъаргъанына, къараб, ала бла иш джюрютебиз. Москвада фабрикала бла ишлейбиз, анда болгъан текстиль кёрмючлеге барыб, алада текстиль фабрикаланы келечилери бла танышыб, юлгюлери бла бизге ийген каталоглагъа къараб, алай ишлейбиз. Ала бизге джангы къумачланы кеслеринден неда Москваны базарларындан ашырадыла.
Окъургъа, юренирге излеген джаш адамлагъа болушабыз. Биз юретген къызла салонла ачыб тыйыншлысыча ишлейдиле. Окъургъа излегенни, тырмашханны мындан ары да юретирикбиз. Адамны бир усталыгъы болса, ишсиз къалмайды, эринмей кюрешсе хайыр этерикди, - дейди Аминат.
Аминат бла баш иеси Джанибекланы Марат бир джашчыкъ бла бир къызчыкъны халкъны ашхы адетлерини, адебни, намысны тёрюнде ёсдюредиле.
Алия быйыл окъуу джыл башланса школгъа биринчи классха окъургъа барлыкъды. Закариягъа 4 джыл болгъанды.
«Радуга» деген терезе джабыула этген, сатхан салон «Эресейни къумач тюкенлерини, терезе джабыу салонларыны 100 игиси» деген, федерал дараджада бардырылгъан кёрмючге къошулуб, атын сый бла айтдыргъанды. Адамла айтхандан, «Радуга» салонну таныгъанла бек кёбдюле. Ала терезе джабыу эмда башха затла этген бу салонну бардыргъан ишин бек джаратадыла, кесине да ышанадыла. Талай бир джылны ичинде кёлю къалгъан неда джаратмагъан болмагъанды. Аминат коллективи бла хар затны джик-джигине дери джетдириб, ишин махтаулу дараджада бардырады.

 
{jcomments}