Къарачай районну Джангы Теберди элини орта школуну 11-чи классыны сохтасы Темрезланы Амира школчуланы арасында литературадан бардырылгъан Бютеуэресей олимпиаданы ахыр этапыны призёру болгъанды.

Алтотур (март) айны 27-ден арттотур (апрель) айны 2-не дери Москвада кърал педагогика университетни тамалында литературадан Бютеуэресей олимпиаданы ахыр этапы ётгенди. Олимпиаданы финалына къралыбызны 84 регионундан 300-ден артыкъ сохта къошулгъанды. Школда окъугъанла юч тюрлю эришиуде (текстге анализ этиу, сынау иш эмда соруу-джууаб) билимлерин кёргюзгендиле.
«Эришиулени эсеблерине кёре Темрезланы Амира олимпиаданы призёру болгъанды. Амираны олимпиадагъа Черкесск шахарны 5-чи номерли гимназиясыны орус тил бла литературадан устазы Евгения Абросимова хазырлагъанды.
Амира кёб тюрлю конкурслагъа, олимпиадалагъа къошулуб, алада алчы орунланы алыб тургъанды. Ол экологиягъа, туугъан джуртуну табигъатын сакълаугъа артыкъ эс бёледи. 9-чу классдан бери Бютеуэресей олимпиаданы муниципал эмда регионал этапларына тири къошулгъанлай келеди», - деб хапар айтхандыла КъЧР-ни Окъуу бла илму министерствосунда.
Бюгюнлюкде Амира школда окъугъанланы «Открой в себе учёного» деген IX-чу Бютеуэресей илму конференцияларына къошулургъа хазырланады. Ол сайлау кёзюуню лауреаты болуб, конференцияны очно халда бардырыллыкъ этапына къошулургъа Санкт-Петербургга чакъырылгъанды.