Арттотур (апрель) айны 1-де КъЧР-ни Башчысы Темрезланы Рашид РФ-ны билим бериуюню министри Сергей Кравцов бла тюбешгенди. Ала окъуу учреждениелени къурулушлары къалай баргъанларыны, школлагъа тамамлы ремонт этиуню юслеринден сёлешгендиле.

Министр айтхандан, инфраструктураны айнытыуну, окъуу учреждениелени бусагъат заманны излемлерине кёре джарашдырыуну магъанасы бек уллуду. Ол ишге устазла, сохтала, ата-анала къошулсала тыйыншлыды.
«Модернизация школьных систем образования» деген программаны тамалында 2022-чи – 2023-чю джыллада республиканы 23 школуна тамамлы ремонт этилликди. Аны бла байламлы керекли къагъытла джарашдырылгъандыла.
Тюбешиуню кёзюуюнде КъЧР-де ол программаны 2023-чю джылдан сора да болджалын созууну юсюнден мадарла сюзюлгендиле. Республиканы энтда 19 школун тамамлы ремонт этиу бла байламлы программагъа къошаргъа тилек къагъыт берилгенди.
КъЧР-ни Башчысы чертгенден, арт джыллада окъуу санагъатны ёсдюрюуню хакъындан кёб джумуш баджарылгъанды.
«Къарачай-Черкесияда 10 джылны ичинде 70 сабий сад, 20 школ ишленнгенди эмда реконструкция этилгенди.
Быйыл Гюрюлдеуюк элде джангы школ хайырланыугъа берилликди. Ючкекенде 960 сохтагъа орну болгъан школну къурулушу барады, эндиги джыл Адыге-Хабль элде джангы школ ишлениб башланныкъды. Школлада кёбюрек сабий сыйыныр ючюн Черкесск шахарны 6-чы номерли орта школуна, Хабез элде лицейге-интернатха къошакъ мекямла ишленникдиле. Бюгюнлюкде республикада 23 школгъа тамамлы ремонт этиле турады», - дегенди Темрезланы Рашид.