Бу кюнледе Эресей Федерацияны Эл мюлк министерствосунда, министр Дмитрий Патрушевни башчылыгъы бла, видеоконференция халда оператив штабны кенгеши болгъанды. Анда агропромышленность комплексде эмда сатыу-алыуда къуралгъан болумну сюзгендиле.

Къарачай-Черкесиядан кенгешни ишине республиканы эл мюлк министри Боташланы Анзор къошулгъанды.

Кенгешчиле ашарыкъ товарлагъа, минерал ашаулагъа багъала салыу бла байламлы соруулагъа къарагъандыла, джазгъы сабан ишле къалай бардырыллыкъларыны юслеринден сёлешгендиле.

Къарачай-Черкесияны эл мюлк продукциясын сатыу-алыуда хал бирчалай турады. Регион кеси кесин адамлагъа бек керекли продуктала бла баджарады. План бла белгиленнгеннге кёре, быйыл республиканы сабанларыны 111,3 минг гектары хайырландырыллыкъды, аны 86,5 минг гектарын мюрзеу аллыкъды.

Кюзлюк мюрзеу 24,9 минг гектар джерге себилгенди. Аны 44 проценти аламатды, 56 проценти да аман тюлдю, ортачады.

(Бизни корр.).