Алтотур (март) айны 3-де КъЧР-ни VI-чы кере сайланнган Халкъ Джыйылыууну (Парламентини) депутатларыны кёзюулю 35-чи сессиясы ётгенди. Аны Парламентни Председатели Александр Иванов бардыргъанды.

Сессияны кёзюуюнде депутатла 16 сорууну сюзгендиле.

РФ-ны субъектлеринде Конституцион сюдлени къоратыу бла байламлы федерал законда этилген тюрлениулеге кёре, КъЧР-ни Прокуратурасы теджеген законну проектине къаралыб, къабыл этилгенди. Алай бла КъЧР-ни талай законуна тюрлениуле кийирилгендиле. Аладан КъЧР-ни Конституцион сюдюню ишини эмда эркинлигини юслеринден айтылгъан джерлери кетериледиле.

КъЧР-ни «Об административных правонарушениях» деген законуна тюрлениуле кийирилгендиле. Ол законну проектине кёре, Къарачай-Черкесияны кърал власть органларыны норматив-право бегимлерин толтурмагъанланы неда бузгъанланы административ халда джууаблылыкъгъа тартырыкъдыла.

Законну 3.4-чю статьясында КъЧР-ни кърал власть органлары чыгъаргъан норматив-право бегимлерин толтурмагъанлагъа неда бузгъанлагъа къаллай бир тазир салыннганы белгиленеди. Алайды да, адамлагъа 1 минг сомдан 2 минг сомгъа дери; кърал къуллукъчулагъа (федерал власть органланы КъЧР-де бёлюмлеринде ишлегенледен къалгъанла) 1500 сомдан 3 минг сомгъа дери; юрист кючю болгъанлагъа 5 минг сомдан 30 минг сомгъа дери тазир салынады.

Законну 4-чю статьясына кёре муниципал норматив-право бегимлени толтурмагъан неда бузгъан адамлагъа 500 сомдан 2 минг сомгъа дери; кърал къуллукъчулагъа 1 минг сомдан 3500 сомгъа дери; юрист кючю болгъанлагъа 5 минг сомдан 30 минг сомгъа дери.

Бегимни бузгъанланы ишлерине джарашдырыучу сюдюле къарарыкъдыла. Аны бла байламлы протоколланы КъЧР-ни Башчысы, КъЧР-ни Халкъ Джыйылыууну Председатели, КъЧР-ни Правительствосуну Председатели белгилеген толтуруучу власть органланы къуллукъчулары джарашдырлыкъдыла.

Ызы бла «О внесении изменений в Закон Карачаево-Черкесской Республики «О квотировании рабочих мест для инвалидов в КЧР» деген законну проекти къабыл этилгенди. Анга кёре, сакъатлыкълары болгъанла ишге кирир мадар табарыкъдыла.

Энди Къарачай-Черкесияда иш бериучюлеге, ишчилерини саны 100-ден атлай эсе, сакъатлыгъы болгъан адамны ишге алыргъа деб 4 процент квота бериледи. Ишчилени саны 35-ден 100-ге дери болса, квота 3 процентди.

Ол законну 5.1-чи статьясына кёре КъЧР-ни кърал власть органларына сакъатлыкълары болгъанланы квота бла ишге алыу къалай баргъанына къараргъа эркинлик бериледи.

Дагъыда депутатла федерал законлада болгъан тюрлениуле бла байламлы талай законну проектин сюзгендиле.

Артыкъсыз да, «О внесении изменений в статьи 12 и 13 Закона Карачаево-Черкесской Республики «О территориальном планировании и планировке территорий в КЧР» деген законну проектине кёре джерлени джарашдырыуну юсюнден къагъытланы бегитиуню болджалы тюрленеди.

«О внесении изменений в статью 2 Закона КЧР «О закреплении отдельных вопросов местного значения за сельскими поселениями в Карачаево-Черкесской Республике» деген законну проекти да къабыл этилгенди.

 

САЛПАГЪАРЛАНЫ Умар.

 
{jcomments}