«Шимал Кавказны курортлары» АО бютеу солуу кёзюуюню юч курортда бирден хайырландырыргъа боллукъ ски-пассла чыгъаргъанын баямлагъанды.
Джангы чыгъарылгъан ски-пассны алгъан адам аны бла Къарачай-Черкесияны «Архыз» курортунда, Къабарты-Малкъарны «Эльбрус» курортунда, Чеченни да «Ведучи» курортунда бютеу тау лыжа кёзюуде ненча кюнню сюйсе да солургъа боллукъду.
Алай этилгенини себебинден туристле бир джоюм этгенлери бла хауа болумгъа кёре тау лыжа джоллары таб джарашдырылгъан Архызгъа, джылны къайсы чагъында да къарлы Минги Таугъа, юйдеги солуугъа джораланнган Ведучиге барыб солур мадар табарыкъдыла.
«Архыз» курортда бютеу солуу кёзюуге сатылгъан ски-пассла иги хайырландырыладыла. Быйыл, «Эльбрус» курорт бла бирикгеникде, къонакълагъа джангы таблыкъла къурар хыйсабыбыз болгъанын ангыладыкъ. Джангы чыгъаргъан ски-пассларыбыз кёб тюрлю тау лыжа трассала бла эм кёб заманны солургъа джарарыкъдыла», - дейди «Шимал Кавказны курортлары» АО-ну баш директору Хасан Тимижев.
Юч курортда да хайырландырыргъа боллукъ ски-пассны багъасы уллу адамгъа 50 минг сом, сабийге да 32,5 минг сомду. Аны алгъан адам солуу кёзюуюню аллындан ахыр кюнюне дери юч курортну къайсысында да солуб турургъа боллукъду. Ол иш, солуу, байрам кюнледе да бирча хайырландырылады.
Аллай ски-пассны «Архыз», «Эльбрус» курортланы официал сайтларында алыргъа боллукъду. Алай этген адамгъа «Ведучи» курортха ски-пасс саугъа халда берилгеннге саналады. Картаны активациясы эм алгъа барылгъан курортда этиледи. Артда аны бла ол бир эки курортха баргъан адам, джангыдан ачха тёлемез ючюн, баргъан джеринде бир кере кассагъа къайтыб, алайда болгъанын билдирирге керекди.
Арт кёзюуде быллай таблыкъла къуралгъанлары, кешбэк программа толтурулгъаны туризмни ёсюмюне себеблик этедиле.
Озгъан джылдан бери турист кешбэк бла 2 мелиуан адам хайырланнганды. Ала солуу кюнлерин джарыкъ ётдюрюрге 35,5 миллиард сом джойгъандыла. Этген джоюмларыны 6,7 миллиард сому кешбэк программа бла туристлени кеслерине къайтарылгъанды.
Никкол (июнь) айны 16-да Туризмни хакъындан федерал агентство ол программаны къачхы кёзюуюн башлагъан эди. Аллында этилген оноугъа кёре ол элия (июль) айны ахырында бошаллыкъ эди. Кёб болмай турист кешбэк программа хычаман (август) айны ахырына дери созуллугъу баямланнганды. Ары дери алыннган путёвкала бла аууз-герги (октябрь) айны 1-ден эндреуюк (декабрь) айны 24-не дери РФ-ны регионларыны къайсысында да солургъа боллукъду. Алайды да, кешбэк программаны тамалында къач кёзюуде солугъан туристлени бир кесек ачхалары ызларына къайтарыллыкъды.
Кешбэк программагъа къонакъ юйде 2 кюнден аслам тургъан, солур джерлерине дери джолоучулукъгъа джоюлгъан туристле къошулургъа боллукъдула.
Программаны бу кёзюуюнде да РФ-ны регионларында джер-суу кёре айланыргъа эмда солургъа этилген джоюмну 20 проценти ызына къайтарылгъан адет сакъланнганды. Алай а, не кёб ачха джойгъан туристге да 20 минг сомдан кёб къайтарыллыкъ тюлдю. Ызына тёленник ачха путёвка алыннгандан сора 5 кюнню ичинде «МИР» картагъа тюшеди. Бир карта бла талай путёвка да алыргъа болады.
Адамланы къралыбызны ичинде туризмге кёллендирирге джораланнган программаны толтуруугъа къонакъ юйлени къайсы бири да, ЕФРТ-да эсебге тюшюрюлген туроператорла, классификацияны ётген санаторий-курорт организацияла, туристлени джумушларын этген бютеулей да 3 минг иш нёгер къошулгъанды. Аланы атлары толу тюшюрюлген тизимге мирпутешествий.рф сайтда къараргъа боллукъду. Кэшбек программаны толу хапары да ол сайтха салыннганды.
БАЙРАМКЪУЛЛАНЫ Зульфия.
