Джууукълашыб келген джангы окъуу джыл Черкесск шахарны 19-чу номерли гимназиясыны сохталары физика, химия, биология дегенча дерследе окъугъанларын сынаб кёрюр мадар да табарыкъдыла.

Къыркъаууз (сентябрь) айны 1-ден ол окъуу учреждениени тамалында, бизни республикада биринчи болуб, «Кванториум» технопарк ачыллыкъды.
«Кванториум» технопаркга джюрюген сохтала, технология джетишимлени хайырландырыргъа джарагъан бусагъатхы керекле бла хайырлана, техника эмда табигъат илмуланы юслери бла сынаула бардырыб, окъугъанларын къоллары бла этиб, кёзлери бла кёрюрге боллукъдула.
Джангы технопаркда сабийле проектле салырча, тинтиу ишлерин бардырырча робототехника бла, био-, гео- эмда аэромоделирование бла кюреширча лабораторияла боллукъдула, хайтек зона да къураллыкъды.
«Кванториум» ёсюб келген тёлюлеге къой, устазлагъа да мастер-классла, аны кибик башха ачыкъ дерсле бардырыргъа, сынамларын ёсдюрюрге да джарарыкъды.
«Кюнден кюннге сабийлени билимлерин ёсдюрюрге, фахмуларын ачыкъларгъа джол ачыла баргъаны къалай игиди. Табигъат илмудан, математикадан, информатикадан, технологияладан терен билим алгъан сабийле дунияда болгъан затланы ангылаб барлыкъдыла. Алай бла аланы билимлери заманны излемлерине кёре ёсерикди», - деб джазгъанды «Кванториум» технопаркны юсюнден КъЧР-ни Башчысы Темрезланы Рашид Инстаграмда кесни аккаунтунда.

СОЛТАНЛАНЫ З.

 
{jcomments}