Элия (июль) айны 29-да РФ-ны Правительствосуну Председателини орунбасары Александр Новакны башчылыгъы бла Пятигорскеде Шимал Кавказ федерал округну социал-экономика ёсюмюне аталыб кенгеш бардырылгъанды. Кенгешге КъЧР-ни Башчысы Темрезланы Рашид да къошулгъанды.
«РФ-ны Экономика ёсюмюню министерствосу 2035-чи джылгъа дери округну социал-экономика ёсюмюню хакъындан программаны джангы проектин къурагъанды. Бюгюнлюкде анга къарала турады. Программаны правительство дараджада быйыл къабыл этерикбиз деб ышанама», - дегенди Александр Новак кенгешни ача.
РФ-ны Президентини Шимал Кавказ федерал округда Толу эркинликли келечиси Юрий Чайка ШКФО-ну регионларыны ёсюмюне атаб кенгеш бардыргъаны ючюн Александр Новакга разылыгъын билдиргенди.
Юрий Чайка чертгенден, округну социал-экономика ёсюмюню хакъындан сорууланы РФ-ны Правительствосуну Председатели Михаил Мишустин, аны орунбасарлары, федерал власть органланы башчылары кёз туурада тутадыла.
Кенгешде РФ-ны Правительствосуну Председателини буйрукъларын толтурууну мадарларыны юсюнден сёлешиннгенди.
«Правительство бизге Шимал Кавказны регионлары бла бирге субъектлени экономика ёсюмлери бла байламлы моделлени къураргъа буйрукъ берген эди. Ол регионлагъа инвестицияла къошууну, аланы экономикаларын джангы дараджагъа чыгъарыуну «джол карталары» боллукъду. Аллай ишлени андан ары да бардырлыкъбыз. Бюгюнлюкде ШКФО-ну субъектлерини экономикаларын ёсдюрюуню хакъындан джангы мадарла къурау бла кюрешебиз», - деб чертгенди РФ-ны экономика ёсюмюню министри Максим Решетников.
«Округну регионларында экономика ёсюмню моделлерин къурау бла байламлы ишле тамамлана турадыла. Экономикагъа иги танг ёсюм алдырлыкъ санагъат туризмди.
Белгилисича Кавказны «саулукълу» эмда «узакъ ёмюрлю» деген сёзле бла байламлы этедиле. Бизни округ орналгъан джерле ариу табигъаты бла, таза хауасы бла Эресейни башха регионларыны арасында алчы орунланы бирин алады.
Алагъа кереклисича оноу этерге эмда инвесторла келирча мадарла къураргъа керекди. Башхалагъа ушамагъан багъыу эмда саулукъ сакълау курортланы хайырландырыугъа да, эндиги тёлюлеге къалырча, аяулу къараргъа кереклисин унутмазгъа дурусду», - деб чертгенди Юрий Чайка.
Ол айтханнга кёре, быргъыла аман болгъанлары эмда коммунал предприятиеле тыйыншлысыча ишлемегенлери амалтын округну субъектлерине инвесторланы чакъыргъан къыйынды. Аны бла байламлы коммунал инфраструктураны джангыртыуну хакъындан программала къурауну юсюнден да сёлешиннгенди кенгешде.
Шимал Кавказны регионларыны инвестицион кючлерини юсюнден айта, Юрий Чайка Эресейни Правительствосу инвестициялагъа кърал джанындан болушлукъ этиуню игилендирир ючюн бардыргъан иш файдалылыгъын кёргюзгенин чертгенди. Ол Шимал Кавказны ёсюм институтларын джангыдан къурау бла, Эресей Федерацияны «Развитие Северо-Кавказского федерального округа» деген программасыны джангы редакциясын джарашдырыу бла байламлыды.
«Ол санагъатда магъаналы тюрлениуле этер ючюн инвестицияланы хакъындан талай программа толтуруллукъду. Артыкъсыз да къралны хар регионунда инвестицион декларацияла, картала, инвестицияла къошууну джорукълары, инвестицион проектлени реестри къураллыкъдыла», - дегенди Толу эркинликли келечи.
Кенгешни аягъында Юрий Чайка кърал къуллукъчула биригиб ишлеселе округда болгъан ресурсланы тыйыншлысыча хайырландырыргъа боллугъуна ышаннганын билдиргенди. Ол иш магъаналы проектлени толтурургъа болушуб, 2030-чу джылгъа уллу кёргюзюмлеге джетер мадар берлигин да чертгенди ол.
