Уруп районну ара больницасы бюгюнлюкде эм юлгюлю больницаланы бири болур. Ол 1972-чи джыл хайырланыугъа берилген эди. Талай къабатлыды. Тышындан, ичинден къарасанг да, ол кёб болмай ишленнгенча кёрюнеди, иги сакъланнганды. Районну башчылары анга заманында ремонт этдириб тургъандыла.
1972-чи джыл ол хайырланыугъа берилгенлей огъуна аны тамада врачы Боташланы Илиясны джашы Мусса болады. Боташланы Мусса ол кёзюуде бизни областда, Ставрополь крайда да белгили хирургланы бири эди. Къыйын операцияланы этген бла къалмай, кесин джууаблы къураучу медицина къуллукъчуча танытханы себебли болгъан эди больницаны тамада врачы.


Келир джыл больница хайырланыугъа берилгенли 50 джыл толлукъду. Ма ол кёзюуню ичинде бу больницада кёб врачла махтаулу ишлеб, атларын иги бла айтдырыб тургъандыла. Не зат тюрленнгенди ол кёзюуню ичинде больницада? Ол джылладача болмай, бусагъатда район больница заманны излемине джууаб эте, керекли затла бла толусу бла баджарылгъанды. Шахар больницалада болгъан медицина керекли затла мында да бардыла. Уруп район республиканы эм къыйырдагъы району болгъаны амалтын, анга керти да уллу эс бёлюнеди. Нек десегиз, къыйын ауругъан адамны Уруп райондан Черкесск шахаргъа алыб келген бек къоркъуулуду. Эки, юч сагъатны ичинде, джолгъа уа аллай бир заман кетерикди, медицина болушлукъ этилмеген адам ачыргъа боллукъду. Алай болмаз ючюн районну врачлары, киши болушлукъну сакълаб турмай, бюгюн заманны излемине джууаб этген медицина кереклеге таяна, кеслери кюреширге керек боладыла ауругъанны ёлюмню къолуна бермез ючюн.
Район больницада джамагъатха керекли бёлюмлени бары да ишлейдиле. Сёз ючюн, терапия, неврология, хирургия, гинекология, педиатрия, инфекцион бёлюмле. Кече-кюн ишлеб тургъан стационарда 80 ауругъаннга орун барды. Андан сора да кюндюзгю стационар да ишлейди: 27 ауругъан, кюндюз келиб, медицина болушлукъ алыб кетедиле. Районда уа 22 мингден аслам адам джашайды. Ма ол сандан 16000 адам район поликлиника бла байламлыды. Кюн сайын дегенча 200-ден аслам адам саулугъун тинтдирирге, бакъдырыргъа джюрюйдю.
Диагностика къуллукъну медицинада уллу магъанасы болгъаны ол хакъды. Диагностикады адамны неси, къалайы ауругъанын ачыкълагъан. Врачла да, ауругъанны саулугъун тинтиб, диагностика билдиргеннге кёре, багъыб башлайдыла. Дигностика къуллукъну уа талай бёлюмю барды. Анга рентгенология бёлюм, функционал диагностика, УЗИ эмда эндоскопия кабинетле, клинико-диагностика лаборатория киредиле. Кесигиз кёргенигизча, диагностика къуллукъну бютеу кабинетлери, лабораториясы толусу бла ишлейдиле. Сёз ючюн, клинико-диагностика лабораторияны къуллукъчулары кеслерини борчларын сый бла толтурадыла. Джылдан джылгъа тинтиу ишлени аслам бардырадыла. Алай бла аругъаннга керек болмагъан анализлени санын азайтадыла.
Медицина учреждениеле бюгюннгю заманны излемине джууаб этген керекли затла бла толусу бла барджарылыб турсала да, терен билимли врачла, медсестрала болмасала, иш алгъа барлыкъ тюлдю. Район больницада 32 врач, 200-ден аслам орта эмда гитче усталыкълары болгъан медицина персонал ишлейдиле. Медицина къуллукъчуланы асламысы баш категориялыдыла. Анга да къарамай, врачла эмда орта билимлери болгъан медицина къуллукъчула кеслерини билимлерин ёсдюргенлей турадыла. Сёз ючюн, озгъан джыл кеслерини билимлерин 3 врач бла 82 медсестра ёсдюргендиле.
Къайсы больницада да, ол участок больница эсе да, терк болушлукъ этген транспорт болмай къалмайды. Уруп районну ара эмда участок больницаларында ауругъанлагъа барыб, алагъа медицина болушлукъ этген машинала эркиндиле. Больницада сегиз бригада, эки кёзюу бла ишлейдиле. Больница терк болушлукъ этген транспортну джыл сайын джангыртханлай турады. Бютеулей алыб къарасакъ, транспортну бары да джангыладыла деб къояргъа боллукъду.
Бу арт джыллада район аралыкъдан узакъда орналгъан талай элде фельдшер-акушер пунктла ачылгъандыла.
- Ара больницадан сора да бизни районда участок больницала, фельдшер-акушер пунктла да ишлейдиле, - дейди район больницаны тамадасыны заместители Биджиланы Раиса Шогаевна. - Сёз ючюн, Пхия, Рожкао, Предгорное, Ершов элледе фельдшер-акушер пунктла, ишлениб, хайырланыугъа берилгендиле. Район больницача, ала да керекли медицина оборудованиеле бла баджарылгъандыла. КъЧР-ни Саулукъ сакълау министерствосу бизни районнга эс бёлюр ючюн къалмайды. Бу арт кёзюуде юч транспорт бергенди. Къысхача айтсам, Уруп районну саулукъ сакълау учреждениесинде ишлеген врачла, медсестрала тамам кёллениб урунурча болумла къуралгъандыла. Ол затны эсге ала, бир къауум врачларыбыз махтаулу ишлейдиле. Сёз ючюн, Байрамкъулланы Рамазанны джашы Анзор, Котляр Владимир Никитович, Мысина Татьяна Евгеньевна, Данилова Валентина Николаевна КъЧР-ни махтаулу врачларыдыла, уллу сынамлары болгъан, кёб адамны саулукъларын ызына къайтаргъан медицина къуллукъчуладыла. Абайханланы Зарият, Рамазанны къызы врач-акушеркады. Махтаулу врачладан билими бла, иш сынамы бла артха къалмайды. Больницада кёбден бери ишлеб, атын махтау бла айтдырыб турады.
Врачлагъа уллу болушлукъ этиб турадыла медсестрала Ёзденланы Зарета, Муссаны къызы, Борлакъланы Полина, Джаннганны къызы. Была терен билимли, сынамлы медсестраладыла.
Башында айтханымча, бизни район больницабызда эмда районну эллеринде орналгъан фельдшер-акушер пунктлада хар медицина къуллукъчу тамам кёлю бла урунуб, ишинден къууанырча болумла къуралгъандыла. Район больницаны тамадасы Черноземова Лариса Николаевна, тюрлю-тюрлю миллетлени келечилеринден къуралгъан коллективни бирикдириб, таб башчылыкъ этеди.

Къобанланы Махмут.

 
{jcomments}