Къарачай-Черкесияны Башчысы Темрезланы Рашид район администрацияланы башчыларына коронавирусха къаршчы мадарла къалай хайырландырылгъанларын тинте турургъа борч салгъанды.

Элия (июль) айны 28-де Къарачай-Черкесияны Башчысы Темрезланы Рашид видеоконференция халда республиканы коронавирусха къаршчы кюрешни бардыргъан Оператив штабыны кёзюулю кенгешин бардыргъанды. Анга КъЧР-ни шахарларыны мэрлери бла районларыны администрацияларыны башчылары къошулгъандыла.


Кенгешде коронавирусну джайылыб баргъаныны, бусагъатда госпиталлада джатхан джердешлерибизни халларыны, вакцинация этиуню юслеринден докладла этилгендиле.
«О мерах повышенной готовности» деген Указ тыйыншлысыча толтурулмагъаны амалтын, санитар-эпидемиология болум къолайсыз болуб баргъаны да айтылгъанды.
Башчы республиканы муниципал къуралышларында ауруу бирча джайылмагъанын чертгенди.
«Не кюрешсек да, коронавирус джукъгъан адамланы саны ёсюб, госпиталлада орунла толуб, медицина къуллукъчуланы ишлери да кёбден кёб болуб барады. Статистика эсеблеге къарасакъ, вакцинация тири бардырылгъан муниципал къуралышлада ауругъанланы саны аз, башхалада кёб болгъаны кёзге тюртюледи», - дегенди Темрезланы Рашид.
Регионда санитар-эпидемиология болум къолайсыз болгъанлыкъгъа, бирча, ариу тургъан районла да бардыла. Сёзден, кенгешде Ногъай районну администрацисыны башчысы Мурат Хапиштов айтхандан, ол райондан адамланы кёбюсю кеси разылыкълары бла вакцинация этдиргенлерини себебинден бусагъатда анда коронавирусдан инджилген хазна джокъду.
КъЧР-ни Башчысы Темрезланы Рашид башха районлада болумну да алай игилендирир ючюн, адамланы вакцинация этдириуге кёллендирирге кереклисин чертгенди. Темрез улу Оператив штабны кенгешини эсеблерине кёре республиканы муниципал къуралышларыны башчыларына джумушлары бла адамла хайырланыучу предприятиеледе ауруудан сакъларыкъ мадарла къалай хайырландырылгъанларын тинте турургъа, вакцинацияны да тири бардырыргъа кереклисин къаты айтханды. Кърал къуллукъчула Башчы салгъан борчланы къалай толтургъанлары келир ыйыкъда бардырыллыкъ кенгешде сюзюллюкдю.
Оператив штабны кенгешинде этилген оноугъа кёре COVID-19 вирусну мындан ары джайдырмаз мадарлагъа бусагъатдан эсе аслам эс бёлюннюкдю. Ауруугъа къаршчы кюрешни бардырыргъа энтда юч ишчи къауум къуралгъанды. Аланы къурамларына КъЧР-ни Промышленностну, отлукъ бла транспортну юслеринден министерствосуну, Черкесск шахарны мэриясыны, Роспотребнадзорну къуллукъчулары бла полициячыла киргендиле.
Ишчи къауумла Черкесск шахарда уллу тюкенлеге, орамда адамлагъа ашарыкъ теджеген предприятиелеге, джамагъат улоулада тинтиуле бардырыб тебрегендиле.
Газет басмагъа берилген кюннге дери ала 5 тюкенде, 4 предприятиеде болгъандыла, 5 транспортха къарагъандыла. Тинтиулени кёзюулеринде ачыкъланнгандан, иш кюнню аллы бла адамланы иссиликлери (температуралары) ёлчеленмейди неда аны юсю бла информация журналгъа тюшюрюлмейди, хауада микробланы, бактериаланы ёлтюрген мадарла (бактерицидные рецеркуляторы воздуха) тыйыншлысыча бир хайырландырылмайдыла, тюкенлеге, предприятиелеге кирген адамлагъа СИЗ-ле теджелмейдиле, сатыу-алыу этген адамла, шофёрла маскала киймейдиле, 1,5-2 метр узакълыкъда джюрюрге, деб айтылгъанны кёб адам сан этмейди, транспортха не заманда дезинфекция этилгенини юсюнден информация тюшюрюлген журналла, маскала кийиб минерге кереклисин баямлагъан къагъытла джокъдула.
Роспотребнадзорну къуллукъчулары санитар-эпидемиология къолайсыз заманда белгиленнген джорукъгъа сыйынмагъан предприятиелеге, къысха заманда ачыкъланнган кемликлени тюзетмеселе, РФ-ны КоАП-ны 6.3 статьясыны 2-чи бёлюмюню тамалында административ джууаблылыкъгъа тартылыргъа боллукъларын эсгертген къагъытла джибергендиле.

 
{jcomments}