«Къарачай» газетни юсю бла Текеланы Умарны джашы Ильясха Огъары Теберди элни бютеу джамагъатыны эмда элни почта бёлюмюню къуллукъчуларыны атларындан да джюрек разылыгъыбызны билдирирге излейбиз.

Ильяс Умарович, сиз хар джыл сайын да бизге уллу болушлукъ этгенлей турасыз, кереклибизге къарайсыз, джетишмеген затларыбызны табдырасыз. Сизни болушлугъугъуз артыкъсыз да бек газетге джаздырыу кампания башланнган кёзюуде уллуду.

Бу къыйын заманда ана тилибизни сакълау баш борчларыбызны бириди, миллетни миллет этген, аны адетлерин, тарихин сакълагъан аны тилиди. «Къарачай» газетибизни да ол ишде къыйыны уллуду. Алай а аны джаздырыб алыб турургъа хар бир адамны да къарыуу джетмейди. Текеланы Ильясны болушлугъу бла уа ана тилибизде чыкъгъан джангыз газетибиз кёблени юйлерине киреди. Почтаны къуллукъчулары да газетге-журналгъа джаздырыуну хакъындан планларын толтурадыла, джамагъат да сюйген газетлерин алыб окъур мадар табады.

Керти уллу, халал джюреги болгъан, джуртун, элин, миллетин сюйген джашыбызгъа, Текеланы Ильясха, джюрек разылыгъыбызны билдире, мындан ары да джамагъатны къууандыра джашаргъа кюч-къарыу берсин сизге Уллу Аллах дейбиз! Бизлени къууандырыб тургъаныгъыз ючюн Аллахдан къайтсын, юйюгюзден-юйдегигизден къууана насыблы джашагъыз, джетишимлеригиз уллу болсунла!

 
{jcomments}