РФ-ны Пенсион фондуну Къарачай-Черкес Республикада управлениесини башчылыгъы сыйлы аналаны Ананы кюню бла джылы алгъышлай, алагъа саулукъ-эсенлик теджей, тиширыула сабийлери бла байламлы къаллай кёлтюргючлюк табаргъа боллукъларын эсгертеди.
Ана капитал сабийлери болгъан юйдегилеге этилген эм магъаналы кърал болушлукъду. Ол 2020-чы джыл башил (январь) айны 1-ден башлаб, биринчи сабий туугъан неда асыралыргъа алыннган юйдегилеге да берилиб тебрегенди. Ары дери 2-чи сабий бла байламлы берилиучен эди. Бусагъатда джангыз сабийге берилген Ана капиталны ёлчеми 466 617 сомду. Бара баргъан заманда юйдегиде экинчи сабий джаратылса, Ана капиталны ёлчеми 150 минг сомгъа ёсерикди.
Быйылгъа дери бир сабийлери болуб, быйыл неда ызы бла келлик джыллада экинчи сабий туугъан юйдегилеге Ана капиталгъа 616 617-сомлукъ сертификат берилликди.
Кёб сабийли аналаны пенсиягъа алгъа чыгъаргъан адет да барды. Сёзден, 8 джыллары толгъунчу 3 неда андан артыкъ сабийге къарагъан ана белгиленнгенден эсе юч джылгъа, 4 сабийи болгъан тёрт джылгъа алгъа пенсиягъа чыгъаргъа боллукъду. 5 неда андан кёб сабий болгъан анала уа, алгъынча, 50 джыллары толгъанлай пенсия алыб башларгъа боллукъдула.
Тегаран, болджалдан алгъа пенсиягъа чыгъарыкъ аналаны эм азында 15 джыл стажлары болургъа керекди.
Гитчелигинден 8 джылы толгъунчу сакъат сабийге къарагъан ана да 50 джылында чыгъаргъа боллукъду пенсиягъа. Алай этер ючюн анга да 15 джыл стаж амалсыз керекди.
Сакъат сабийге неда гитчелигинден I-чи группалы сакъат баласына къарагъан анагъа Пенсион фонддан 10 000 сом тёленеди. Ай сайын аллай пособие алыр ючюн, сакъат сабийге къарагъан ана джукъда ишлемезге керекди.
1,5 джыл толгъунчу сабийлерине къарагъан кёзюулеринде тиширыуланы пенсияларыны страховой кесеклери ёсдюрюледиле. Ала сабийлерине къарагъан кёзюулеринде ишлеб пенсион взносла этмегенликлерине, аланы ол заманларына пенсион коэффициентле берилген адет барды: тиширыу пенсиягъа чыкъгъан заманда аны биринчи сабийине къарагъан бир джылы 1,8 коэффициентге, экинчи сабийине къарагъан бир джылы 3,6 коэффициентге, 2-чю, 4-чю, 5-чи сабийлерине къарагъан хар джылы да 5,4 коэффициентге тенг тергеледиле.
Акъыл-балыкъ болмагъан сабийлери неда 18 джыллары толгъанлыкъгъа окъуй тургъан сабийлери болгъан пенсионер аналагъа тёленнген пенсияны ёлчеми уллуракъ этиледи.
Уллуракъ пенсия алыргъа излеген ана, 18 джыл толмагъан сабийлери, джыллары 18-ден 23-ге дери болгъан, очно окъуй тургъан, аланы къолларына къарагъан сабийлери болгъанларына шагъатлыкъ этген къагъытларын Пенсион фондну джергили органларына элтирге керекди. Бу излемлеге келишген хар сабий ючюн, ананы пенсиясына 1895,42 сом къошулгъан адет барды.
Багъалы тиширыула-анала! РФ-ны ПФ-сы баджаргъан джумушланы барына да заявлениени дистанцион халда Пенсион фондну сайтында неда Госуслуги порталда энчи кабинетлеригизде джазаргъа боллукъсуз.
Пенсияла бла байламлы не тукъум сорууларыгъызгъа да 8 (8782)22-05-42 телефон номер бла къонгурау къагъыб сорсагъыз, РФ-ны ПФ-ны КъЧР-де управлениесини къуллукъчулары толу джууаб берликдиле.
Шаганова Анна,
РФ-ны ПФ-ны КъЧР-де Баш управлениесини СМИ-ле бла иш джюрютген къауумуну тамадасы.
