«Хар кюн сайын, - дегенди вице-премьер, - бизни республиканы къутхарыучулары джууаблы эмда джашау магъаналы борчну толтурадыла. Алай демеклик бизни къыйын болумлагъа тюшген адамларыбызны къутхарадыла, алагъа болушлукъ этедиле. Аллай адамлагъа болушлукъ этиб, аланы ёлюмден, башха къыйынлыкъладан къутхарыр ючюн а, къутхарыучу ишин иги билгенден тышында джигит болургъа, борчуна кертилигин сакъларгъа, табигъат джарсыуланы онглар болумлу уста болургъа керекди. Отрядда къуллукъ этгенле ма аллай ишлерин-борчларын билген, ангылагъан, къуллукъларына толу берилген адамладыла.
Джыйырма беш джылны ичинде бизни республиканы къутхарыучулары адамланы къыйынлыкъладан къутхарыуда кеслерини къуллукъларыны усталары болгъанлары бла джигитликлерин кёб кере кёргюзгендиле. Россияны МЧС-ни Къарачай-Черкесияда излеучю-къутхарыучу отрядыны бюгюннгю къуллукъчулары бла ветеранларына уллу джууаблылыкъ бла джигитликни излеген ишлеринде къаджыкъмай кюрешгенлери, адамланы джашаулары ючюн не къоркъуулу болумда да борчларын артха турмай толтургъанлары ючюн джюрек разылыгъымы билдиреме».
Къарачай-Черкесияны излеучю-къутхарыучу къуллугъуну энчи къурамын Россияны МЧС-ни КъЧР-де Баш управлениесини башчысыны атындан аны заместители Приходько Антон да джылы алгъышлагъанды. Ол айтхандан, республиканы къутхарыучулары кеслерини къаджыкъмай ишлеулери бла джамагъатдан сый, махтау табхандыла. Аны айтыб, ол алагъа къуллукъларында джангы джетишимле, юйдеги насыб, саулукъ теджегенди.
Джыйылыуда Россияны МЧС-ни Къарачай-Черкесияда излеучю-къутхарыучу отрядыны тамадасы Мозгов Андрей, бизни республикада излеучю-къутхарыучу къуллукъну ишини юсюнден хапар айта, ол 1992-чи джыл августну 1-де къуралгъанын билдиргенди. Ол озгъан 25 джылны ичинде отряд баджаргъан ишлени кёргюзюб да сёлешгенди. «Айхай да, ол замандагъы излеучю-къутхарыучу къуллукъ бла бюгюннгю излеучю-къутхарыучу къуллукъну араларында уллу башхалыкъ барды. Аны адам саны да ол замандагъы къуллукъну адам санындан асламды, аны иш кереги да ол замандагъы иш керегинден эсе деменгилиди. Иш баджарыу халы да ол замандагъы халындан узакъ игиди», - дегенди ол.
Бусагъатда Къарачай-Черкес излеучю-къутхарыучу отрядны 8 бёлюмю барды, алада 80 билимли, сынамлы адам къуллукъ этеди. Къуллукъларында джетишимлери ючюн отрядны членлери 23 кере кърал саугъала бла, 200 кере да ведомствону саугъалары бла саугъаланнгандыла. Аланы 3-сю Россия Федерацияны, 16-сы да Къарачай-Черкес Републиканы махтаулу къутхарыучуларыдыла. 2012-чи джыл Къарачай-Черкесияны излеучю-къутхарыучу отряды Россияны МЧС-ни эм иги, эм алчы отрядына саналгъанды, 2014-чю джыл а КъЧР-ни къутхарыучусу Геращенко Д.В. «Россияны МЧС-де эм эбли къутхарыучу» деген атха ие болгъанды.
Мозгов А. айтхандан, Къарачай-Черкес излеучю-къутхарыучу отряд усталыкъ, къыйын болумлада ишлей билиу джаны бла Россияны МЧС-ни эм иги отрядларыны тизиминдеди.
Республиканы излеучю-къутхарыучу къуллугъуна 25 джыл толгъаны белгиленнген кюн болгъан къууанч джыйылыуда аны ишини юсюнден дагъыда кёб джылы сёз айтылгъанды. Отрядны алчы къуллукъчуларыны бир къауумуна ол кюн «25 лет КЧ ПСО» деген медалла да берилгендиле.
