Эресейни Президенти Владимир Путинни излемин толтура, Къарачай-Черкесияда саулукъ сакълауну ал звеносун игилендириуге уллу эс бёлюнеди. Бютюн да республиканы ара шахарындан узакъда орналгъан эллеге къайгъырыу биринчи орундады.

Аллай эллени бири Гитче Къарачай районну Джагъа элиди. Анда врач амбулаторияны ишлеу къызыу джюрюш бла барады. Айтыргъа, мекямны 70 проценти хазыр болгъанды. Мекям толусу бла ишлениб бошалса, аны неси да заманнга толу джууаб этерча джарашдырыллыкъды. Элчиле джангы оборудованиеси, мебели болгъан медучреждениеде кеслерине къаратыргъа мадар табарыкъдыла.
Быйыл республикада 16 медицина объект джангыртыллыкъды. Джангы врач амбулаторияла Доммайда, Счастливоеде, Кубинада, Коста Хетагуровода, Кичи Балыкъда, Элтаркъачда, Къумушда, Эркин-Шахарда, Элбургъанда, Исправноеде, Красный Востокда, Къарданикде ишлене турадыла.
Къызыл Тогъайда джангы фельдшер пунктну къурулушу барады. Элледе джангы медицина учреждениеле ишлеген бла бирге, эскилеге да ремонт этиуге тыйыншлы эс бёлюнеди. Сёз ючюн, бюгюнлюкде Джангы Джёгетейде врач амбулаторияны джангыдан джарашдырыу бла кюрешедиле. Аны кибик Псыжда орналгъан Абаза ара район больницаны мекямына да тамамлы ремонт этиле турады.