Бу кюнледе видеоконференция халда Эресейни МВД-ны Шимал Кавказ федерал округда джергили бёлюмлерини джамагъат советлерини эмда ветеранларыны советлерини бирикген кенгеши ётгенди. Анда сёз округну субъектлеринде джаш тёлюню арасында терроризм бла экстремизмге къаршчы кюреш бардырыуну, аны бла байламлы профилактика ишлени юсюнден баргъанды. Кенгешге Эресейни МВД-ны Шимал Кавказда баш управлениесини тамадасы полицияны генерал-полковниги Сергей Бачурин да къошулгъан эди. Ол кесини сёзюнде кенгешге къошулгъанлагъа, тири ишлегенлери ючюн, разылыгъын билдиргенди. «Шимал Кавказда джамагъат-политика болумну алыб къарасакъ, джамагъатны, артыкъсыз да джаш тёлюню арасында динни юсю бла къаугъала чыгъаргъа боллукъ къоркъуу барды. Нек десегиз, террорист, экстремист бирлешликле къуралыб, адамланы аманлыкъ ишле этерге чакъырадыла. Анга джаш тёлю кёбюрек къошулгъаны барыбызны да къайгъылы этеди. Быйылдан бери аманлыкъчыла полицияны къуллукъчу ларына талай кере от ачхандыла. Аманлыкъ ишлеге къошулгъанланы джыллары орта тергеу бла 20 джыл болады», – дегенди Сергей Бачурин.

Эресейни МВД-ны ШКФО-да баш управление сини тамадасы чертгенден, кенгеш бу халда бардырылгъаныны магъанасы уллуду – округну субъектлерини келечилери профилактика ишлени бардырыуда биригирге керекдиле. Эресейни МВД-ны ШКФО-да баш управлениесини Джамагъат советини председатели Сослан Сикоев регионда джамагъат-политика болумну бузаргъаизлеген тыш къраллы идеологлагъа къаршчы кюреш бардырыргъа кереклисин чертгенди. Ол айтханнга кёре, ол джумушну баджарыр ючюн джорукъ сакълагъан органла бла джамагъат къуллукъчула ишни бирге бардырсала тыйыншлыды. «Экстремист ишлеге джаш тёлю аслам къошулгъанына къыйналабыз. Ёсюб келген тёлюлени ол затдан сакълар ючюн, ала бла тюбешиб, миллетле эмда динле арасы джарашыулукъну бузгъанла, экстремизм бла терроризм бирлешликлеге къошулуб аманлыкъ ишле этгенле джууабха тартыллыкъларын ангылатыргъа керекди», – дегенди Сослан Сикоев. Кенгешге къошулгъанла джаш тёлюню арасында терроризм, экстремизм бла байламлы аманлыкъ ишле джайылмазча не этерге кереклисини эмда профилактика ишле бардырыуну юсюнден оюмларын айтхандыла. Аны бла бирге, джамагъат советле бла ветеранланы советлерини келечилери мындан ары этиллик ишлени сюзгендиле, Эресейни МВД-сы бардырлыкъ джыйылыулагъа къошула турлукъларын да чертгендиле. Кенгешни ахырында Эресейни МВД-ны ШКФО-да баш управлениесини тамадасы Сергей Бачурин джамагъат къуллукъчулагъа разылыгъын билдире, ишлеринде джетишимле теджегенди. КъЧР-ни МВД-ны пресс-къуллугъу.