КъЧР-ни Башчысы Темрезланы Рашидни излеми бла Правительствону къуллукъчулары, муниципал районлагъа айланыб, суу джетишмеген элледе адамла бла тюбешиб, суу системалада тинтиуле бардырыб, бу джарсыуну тюзетир мадарла этиб башлагъандыла. Бу кюнледе ала Уруп районда болгъандыла. Правительствону къуллукъчулары анда уллу кенгеш бардыргъандыла. Ол кенгешге Уруп районну администрациясы бла эл къуралышларыны башчылары, джамагъатны суу бла баджаргъан организацияланы келечилери къошулгъандыла. Кенгешде джамагъатны таза суу бла таймаздан баджарыуну юсюнден сёлешиннгенди. Анга къошулгъанла, алай этерге тыйгъыч болгъан чурумланы ачыкълаб, аланы къоратыр мадарланы айтхандыла. Къысха заманда Псемен элни суу бла баджарлыкъ системаны джарашдырыб, ишлетиб башларгъа оноу этилгенди. Ол ишлеб башлагъанлай элчилени юйлерине да, социал объектлеге да суу джетерикди. Правительствону къуллукъчулары Уруп районда бусагъатда хайырландырылгъан суу системаны халына къараб, аны джангыртыргъа кереклисин чертгендиле.

КъЧР-ни Башчысы салгъан борчну толтура, джамагъатны суу бла баджарыугъа аталгъан ишле Къобан районну Дружба элинде да этиледиле. «Инфраструктура для жизни» деген миллет проектге кёре къуралгъан «Модернизация коммунальной инфраструктуры» деген федерал программаны тамалында Дружба элде эски суу быргъыла джангыртыла дыла, Къобан сууну юсю бла Черкесск бла ол элни байламлы этерик джангы, уллу быргъы да ишлениб башланнганды. Этилген оноугъа кёре, элни ичинде 28 километр узунлугъу болгъан джангы быргъыла салыныргъа керекдиле да, аланы 5 километр чакълы бири салыннганды. Бусагъатда анда къурулуш ишле, Катчи улу Ибрагим хаджини атын джюрютген да, Комсомольская да къошулуб, талай орамда бирден бардырыладыла. Дружба элни администрациясыны башчысы Боташланы Марат айтхандан, бусагъатха дери хайырландырылгъан суу быргъыла эскиден джараусуз болгъан эдиле. «Бусагъатда биз бютеу суу быргъыланы джангырта турабыз. Эскилеге 50 джылдан аслам болгъан эди. Къурулуш ишле элни ичинде да, Къобан сууну тюбю бла да бардырыладыла. Къобанны башы бла 3-километрлик быргъы ётерикди да, сууну арасында анга тиреу салынныкъды. Алай этилгенини себебинден, Дружба да, Заречный да ичерге джараулу таза суу бла баджарыллыкъдыла», – дейди Боташ улу. Ол чертгенден, озгъан джыл аллай ишле Хурзукская бла Архызская орамлада этилген эдиле.