«Бизни бу затны юсюнде баш муратыбыз саулай Къарачай-Черкесияда, аны ичинде Адыге-Хабль районда кёгет терек бачха санагъатны джангыдан джашнатыб, адамларыбызны учуз, алай а асыулу эмда татлы кёгетле бла баджарыуду, республикада джашагъанлагъа джангы иш орунла ачыуду», - деди Темрезланы Рашид, анда сёлеше.
Къарачай-Черкесияны Башчысы айтхандан, республиканы къалайыны да хауа болуму бирча игиди, адам кючю да джетишимлиди, ол себебден аны къайсы районунда да терек бачхала къурар мадар барды. Дженгил ёсген тереклени бютеу Къарачай-Черкесияны территориясына джайыуну юсюнден тема мындан алда Россия Федерацияны эл мюлк министри Ткачев Александр бизни республикагъа официал визит бла келген заманда сёлешиннген темаланы бири болгъанды, деб чертди Темрезланы Рашид.
«Алай бла биз ол тюбешиуде Къарачай-Черкесияны кёгет терекчилик ёсюм алгъан территория этиу джаны бла Россия Федерацияны Эл мюлк министерствосундан тыйыншлы джакълыкъ табханбыз. Мындан ары да биз Россияны Президенти Путин Владимир Владимировични эл мюлкню, артыкъ да бек дженгил ёсген кёгет бачхала къурау джаны бла стратегия башламчылыкъланы толтурур джанындан кюреширге керекбиз», - деди Къарачай-Черкесияны Башчысы.
«Къарачай-Черкесияны кёгет терек бачхалары» деген ООО-ну баш директору Чернов Владимир Темрезланы Рашидге ол башчылыкъ этген эл мюлк предприятие быйыл бачхасыны хар гектарындан 5 тоннадан алма джыйгъанын, ол аны биринчи битими болгъанын айтды. Ол республиканы Башчысына билдиргенден, тереклени келир джылны джазы бла къачында да саллыкъдыла. Алай бла республиканы районларында кёгет терек бачхала 203 гектар джерни аллыкъдыла.
«Къарачай-Черкесияны кёгет терек бачхалары» деген ООО-да бюгюнлюкде 80 адам ишлейди. Сезон ишлеге да 100-ге джууукъ адам алынныкъды.
Бу эл мюлк предприятиеде кёгетлени сакълагъан хранилище ишлерге да белгиленнгенди.
КъЧР-ни Башчысы мурат этгенден, терек бачхала бла уллу компанияла бла бирге энчи бачхала тутханла да кюреширикдиле. Ала ол ишлеринден хайыр да табарыкъдыла. Алай бла Къарачай-Черкесия бютеулей терек бачха бола барлыкъды.
