Ноябрны онуду. Къарачай-Черкесияны ич ишлерини органларында къуллукъ этгенле майданда шеренгалагъа сюелгендиле. Къач болса да, джылыды. Къыбыла джанындан ургъан джылы джелчик, сафлада сюелгенлени Россия Федерацияны ич ишлерини органларында къуллукъ этгенлени кюню бла алгъышлагъанча, бетлерин сылай-сыйпай ётеди. Байрамны къууанчын этерге уа, КъЧР-де ич ишлени министри Трифонов Игорь, республиканы Башчысы бла Правительствосуну Администрациясыны башчысы Салпагъарланы Эльдар, КъЧР-ни Премьер-министри Озов Аслан, Къарачай-Черкесияны Баш сюдюню председатели Семенланы Руслан, ФСБ-ни КъЧР-де Управлениесини тамадасы Кобылченко Игорь, республиканы Халкъ Джыйылыууну (Парламентини) келечилери, дин къуллукъчула, джорукъ сакълаучу органланы тамадалары, ОВД-ны энчи къурамы, ич ишлени органларыны ветеранлары, муниципал районла бла шахарланы башчылары келгендиле.
Байрамгъа аталгъан къууанч джыйылыу башланырны аллы бла Черкесск шахарны сабий хору Россия Федерация бла Къарачай-Черкесияны гимнлерин джырлайды. Андан сора Ич ишлени КъЧР-де министерствосуну байрагъы чыгъарылады. Ызы бла да КъЧР-де МВД-ны бек магъаналы борчланы толтурургъа деб иш этилиб къуралгъан отрядыны къуллукъчуларына ич ишлени Россияны халкъыны тынчлыгъын, аны джамагъат джоругъун, адамларыны джашаулары бла къоркъуусузлукъларын сакълай ёлген къуллукъчуларын эсгериуге аталыб ишленнген эсгертмеге Махтауну гирляндасын салыргъа сый бериледи. Ала ол сыйлы борчну толтургъандан сора къууанчха келгенле, бир такъыйкъаны шум болуб, полицияны къуллукъ борчларын толтура ёлген къуллукъчуларын эсге тюшюредиле.
Андан сора Къарачай-Черкесияны Башчысы Темрезланы Рашидге сёз бериледи.
«Бу байрам, - дейди ол, - законну эмда адамланы къоркъуусузлукъларын сакълагъанла, къыйынлыкъгъа тюшгенлеге хар заманда болушлукъ этерге хазыр тургъанла кимле эселе, аланыкъыды. Бюгюн биз абадан тёлюлени махтаулу адетлерине кертиликлерин хар кюндеги борчларын сый бла толтуруб кёргюзюб тургъанланы, алай бла джамагъат джорукъну сакълаугъа энчи юлюшлерин къошуб келгенлени байрамлары бла таза джюрекден алгъышлайбыз.
Россия Федерацияны Президенти Путин Владимир Владимирович, бюгюн ич ишлени органларыны къуллукъчуларын байрамлары бла алгъышлай, полицияны хар къуллукъчусуну ишине, аны кибик бютеу къуллукъну ишине уллу багъа бергенди. Къралны башчысы чертгенча, Ич ишлени министерствосу джамагъат джорукъну, адамланы эркинликлери бла азатлыкъларын ышаннгылы сакълайды. Россияны Президенти полицияны къуллукъчулары мындан ары кёзюуде да кърал бла джамагъатны не тюрлю къоркъуудан да джигит сакъларыкъларына, боюнларына салыннган борчларын сый бла толтуруб турлукъларына ажымсыз болгъанын билдиргенди».
Темрезланы Рашид Къарачай-Черкесияны джамагъатыны эмда кесини атындан республиканы адамларыны къоркъуусузлукълары бла джамагъат джорукъну сакълауда, терроризмге, коррупциягъа, экстремизмге къаршчы кюрешиуде батырлыкъ, этимлилик, усталыкъ кёргюзюб тургъанлары ючюн республиканы ич ишлерини органларыны къуллукъчуларына джюрек разылыгъын билдириб сёлешди. «Ол затланы кючлеринден, - деди андан ары сёзюнде республиканы Башчысы, - Къарачай-Черкесияда иги инвестицион болум эмда рахат джашарча джамагъат-политика хал къуралгъанды».
КъЧР-ни Башчысы, полицияны къуллукъчуларын бу сыйлы байрамлары бла алгъышлаб, аладан талай адамны Къарачай-Черкес Республиканы кърал саугъалары бла саугъалады. Сёз ючюн, Къарачай-Черкесияда ич ишлени министри Трифонов Игоргъа, полицияны подполковниклери Стрельников Сергейге, Фролов Александргъа, Элкъанланы Ойдургъа «Къарачай-Черкес Республиканы ич ишлерини органларыны махтаулу къуллукъчусу», полицияны майору Элкъанланы Зурабха «Къарачай-Черкес Республиканы махтаулу юристи» деген атла атаб, алагъа удостоверениелерин берди. Полицияны талай къуллукъчусу да КъЧР-ни Башчысыны Бюсюреу къагъытлары бла саугъаланды.
КъЧР-ни Правительствосуну Председатели Озов Аслан да боюнларына салыннган борчларын сый бла толтуруб, атларын махтау бла айтдырыб келген къуллукъчудан талай адамгъа Хурмет грамотала берди.
Ол кюн полицияны ветеранларына да кёб махтау айтылды. Тюрлю-тюрлю саугъала бла саугъаланнганла да болдула.
Алай бла 2017-чи джылны ноябрны 10-су Къарачай-Черкесияны ич ишлерини органларында къуллукъ этгенледен кёблеге ёмюрлюкге эсде къаллыкъ къууанч кюн болуб ётдю.
ХУБИЙЛАНЫ Абу-Хасан.
