Буз къала ишлерге болушурукъду
Къарачай-Черкесияда буз къала ишленникди эмда «Саулукъ» деген стадионнга ремонт этилликди. Ол затлада джетишимли болур ючюн а иги танг кесек ачха керек боллукъду. Ол себебден талай кюнню мындан алгъа КъЧР-ни Башчысы Темрезланы Рашид бла Россия Федерацияны Правительствосуну Председателини спортну, туризмни эмда джаш тёлю политиканы юслеринден заместители В. Муткону тюбешиулеринде аны юсюнден тамамлы сёлешиннгенди. Ол сёлешиуню кёзюуюнде Виталий Леонтьевич Темрезланы Рашидге аны юсюнде болушургъа айтханды.
Къарачай-Черкесияны Башчысы ол эки объектни да документлери хазыр болгъанларын билдиргенди. Аллыбызда джууукъ заманда КъЧР-ни Правительствосу, аланы профилли программалагъа къошдурур ючюн, заявкала джарашдырыб, тыйыншлы джерлерине джиберликди.
Ол кюн КъЧР-ни Башчысы Темрезланы Рашид бла РФ-ны вице-премьери В. Мутко Черкесск шахарда «Нарт» стадионну реконструкциясы къалай баргъанына да къарагъандыла. Ала, разы болуб, бир аууздан чертгенден, аны кёб заты этилгенди. Алай а анда алкъын баджарыллыкъ ишле аз тюлдюле.
Хар неси тындырылыб бошаса уа, «Нарт» стадион Шимал Кавказ регионда спорт инфраструктураны эм уллу объекти боллукъду. Аны себебли В. Мутко КъЧР-ни Башчысы Темрезланы Рашидни анда россия дараджалы уллу спорт эришиулени бардыра турургъа теджегенин къабыл кёргенин билдиргенди.
Виталий Леонтьевич Къарачай-Черкесияны турист кючюне да уллу багъа бергенди. Аны бла бирге ол бизни курортларыбызны, аланы спорт сервислерин ёсдюрюуню юслеринден талай магъаналы оюм да айтханды.
Къарачай-Черкесияны Башчысы Темрезланы Рашид ол тюбешиуню эсеблерине кёре КъЧР-ни Правительствосуну Председатели Озов Аслан бла эмда аны заместителлери бла джыйылыу бардыргъанды. Анда къараргъа чыгъарылгъан ишле терен сюзюлгенден сора регионну Башчысы республиканы Правительствосуна «Саулукъ» деген стадионну реконструкциясын бардырыуну эмда республикада буз къала ишлеуню проект-смета документлерин хазырлаб башларгъа борч салгъанды. Аны бла бирге Министрлени кабинети, ол объектлени къурулушларын, КъЧР да къошулуб, РФ-ны Минспорту бардырыр ючюн, аланы профилли программалагъа кийирирге керекли документлени да джарашдырыб берирге керекди.
Къурулушлары джылны ахырына дери толу битиб, ишленирге белгиленнген социал эмда инфраструктура объектле джылны ахырына дери хайырланыугъа берилирге керекдиле – быллай борч салгъанды КъЧР-ни Башчысы Темрезланы Рашид республиканы Правительствосуну Председатели Озов Асланнга.
