Россия Федерациядан ол джыйылыугъа барлыкъ келечи джыйын Россия Федерацияны Президенти В.В. Путинни бегими бла къуралгъан эди.
Россияны келечилерини къурамына къралыбызны регионларыны башчылары, Россияны субъектлерини закон джаны бла властларыны тамадалары, Россия Федерацияны Федерал Джыйылыууну Федерация Советини членлери кирген эдиле.
Къарачай-Черкес Республиканы Башчысы Темрезланы Бориспийни джашы Рашид да Россияны келечилерини къурамында Страсбургга баргъанды.
Россия Федерацияны келечилерине башчылыкъ этген Владимир областны губернатору Светлана Орловады.
Бу къачхы сессияда эм бек эс бёлюб, адамланы (мигрантланы) къраллада болгъан джорукъланы бузмагъанлай кёчюу ишлери къалай баргъанына къаралады. Аны бла биргелей, коррупциягъа къаршчы кюрешиуге, джаш тёлю политика бла байламлы, миллетлени ана тиллерин сакълау ишлеге, эл мюлк бла аслам кюрешген районланы айнытыр ючюн не этерге керекди деген соруулагъа да аслам эс бёлюнеди. Бир-бир къраллада, джерледе демократия къаллай дараджада болгъанын ачыкълагъан къралла арасы джорукълагъа келишмеген затла бар эселе, аланы къоратыргъа джол кёргюзюрюк документле хазырларгъа кереклиси да чертилгенди.
Эсигизде эсе да, Европаны Советини конгрессини 32-чи джазгъы сессиясында, саулай Шимал Кавказны республикаларындан биринчи болуб, Къарачай-Черкесияны Кюнлери бек мийик дараджада ётген эди.
Бу джол кесини экономика эмда культура дараджасын Россия Федерацияны Ленинград областы кёргюзюрюкдю.
Францияны Страсбург шахарында Европаны Советини джергили эмда регионал властларыны конгрессини 33-чю къачхы сессиясы бу ыйыкъны ахырына дери барлыкъды.
