Бу кюнледе Ставрополда «Россия – мени тарихим» деген ат бла музей-кёрмюч комплекс къууанч халда ачылды. Аны ишине РФ-ны Кърал Думасыны депутатлары, Ставрополь крайны эмда Къыбыла федерал округ бла Шимал Кавказ федерал округну тамада къауумлары, аланы ичинде КъЧР-ни Халкъ Джыйылыууну (Парламентини) спикери Иванов Александр башчылыкъ этиб элтген делегациясы, аны кибик, дин организацияла бла къазакъланы, джамагъат организацияланы келечилери къошулгъан эдиле.
Комплексни ачылыуун белгилеу башланырны аллы бла Ставрополну эмда Невинномысскени митрополити Кирилл Русну крестители Владимир бийни эсгертмесин сыйлай, кесини дининде, адетдеча, «дууа этди». Ол бийни 13 метр мийиклиги болгъан эсгертме комплексин музей-кёрмюч болгъан джерде майданчыкъда орнатхан эдиле ол кюнледе.
«Россия – мени тарихим» деген мультимедиалы тарих паркны ачылгъаны бла Ставропольени джамагъатын джылы алгъышлады Владимиров Владимир - Ставрополь крайны губернатору.
- Россияны тарихи, - деди ол, - бизни барыбызны да тарихибизди. Анда хар бирибиз да толу базыб аякъ тирерча уллу магъана барды. Ата джуртубузну ётген ёмюрледе махтаулу джоллары бла барырча ёсдюрюрге керекбиз Россияны тамбласын къолгъа аллыкъ сабийлерибиз бла эндиги джаш тёлюбюзню. Сау болсун къралыбызны Президенти регионлада быллай тарих паркланы ишлеуде башламчылыгъы ючюн. Аны тюз оноуу бла бола барады ётген заманда тарихибизни ары бла бери бурургъа кюрешиб, джыртыуну орнуна «тарихни заманы» келиб, орунлу болгъаны, – деб бошады алгъыш сёзюн.

Ставропольени башчысы музей-кёрмюч комплексни тарих бла краеведениеден дерследе билим бериу джаны бла эмда джаш тёлюню патриот сезимли этиб ёсдюрюуде магъанасы уллу боллугъун да айтды алайда.
Джангы ачылгъан музей комплексге биринчи экскурсияны епископ Тихон бардырды. «Россия – мени тарихим» деген тарих парк тёрт уллу экспозицияны бирлешдириб, бир бетден кёргюзгенди. «Романовла», «Рюриковичле», «Уллу джарсыуладан Уллу Хорламгъа» эмда «Россия. Мени тарихим 1945-2016» экспозицияладыла ала. Аланы 900 интерактив мультимедиа стендлени хайырландырыу бла къурагъандыла крайны музейини къуллукъчулары. Ала Ставрополь крайны тарихинде болгъан баш затлагъа да, Орус православ церковланы башха-башха халкъланы бир-бирлери бла байламлы этиулерине да таяна къурагъандыла ол экспозицияланы. Аны кибик, «Россия – мени тарихим» деген тарих паркны къурауда КъЧР-ни музейини фондундан затла да хайырландырылгъандыла. Егорьевканы епископу, Москва бла бютеу Орусну Сыйлы Патриархы Тихон айтхандан, Ставрополда ачылгъан бу музей-кёрмюч комплекс регионлада «Россия – мени тарихим» ат бла къураллыкъ 24 тарих паркны ичинде тёртюнчю болуб ачылгъанды.
- Бюгюн мен кёзюм бла кёрген затла мен сакълагъанны да озгъандыла. Биз, регионну джергили усталары эсеблеб берген башламчылыкъ излемни толтура, экспозицияланы тамалына къошакъ информация «тагъыб» тындырлыкъ болурла, деб тура эдик. Былайда уа ол зат мийик профессионал эмда чыгъармачылыкъ дараджада этилгенди, – деди викарий Тихон.
«Россия – мени тарихим» деген музей кёрмюч комплексни аллында майдан 7,5 минг квадрат метр джерни алады. Музей экспозиция бла аны мекямын ишлегенден тышында да 8 гектаргъа джууукъ «арбазны» айбат кёрюнюрча джарашдырыу ишле да этилгендиле. Музей-кёрмюч комплексни «арбазына» кирген джерде да Ставрополь крайны айнытыугъа уллу юлюш къошхан 16 белгили адамны  баральефлери орнатылгъандыла.