Москвада стратегия тинтиулени халкъла арасы илму инновацион аралыгъы «Задачник по физике конденсированного состояния» деген окъуу пособие чыгъаргъанды.

Аны автору Эресей Федерацияны илмуларыны махтаулу къуллукъчусу, Эресей Федерацияны баш школуну махтаулу къуллукъчусу, А. Нобель медалны иеси Орусланы Байдыматды. Анга «Къарачай-Черкес Республиканы махтаулу илму къуллукъчусу» деген ат да берилгенди.

- Мен илму бла кюрешгенли 40 джыл болады. Баш окъуу заведениеледе джюрюген джорукъгъа кёре, лекцияла бла семинар дерсле бир-бирлери бла алмашыныб барадыла. Ол зат лекцион материалны иги ангыларгъа себеб болады, - дейди Орусланы, Байдымат.  – Ёзге «физика конденсированнгого состояния» деген курсдан литература къарыусузду, задачникле джокъдула. 1991-чи джыл КъЧКъУ-ну базасында «Физика конденсированного состояния» школну ачханымда, бу табсызлыкълагъа тюбеген эдим. Бакалаврла, магистрантла эмда аспирантла бла темаланы ётгенден сора, айтылгъан материалны студентле терен ангылар ючюн, мен задачала къураб башладым. Алайды да, бу окъуу пособиени мен 1991-чи джыл хазырлаб тебрегенме. Кандидат диссертациямы юч джылны, андан сора да докторлукъ диссертациямы да 14 джылны джазгъанма. Ол кёзюуледе да задачала къурагъанымы тохтатмагъанма.

Физика-математика илмуланы доктору, Алийланы Умар атлы Къарачай-Черкес кърал университетни физика-математика факультетини физика кафедрасыны тамадасы, профессор Орусланы Байдымат айтханнга кёре, «физика конденсированного состояния» деген курс физика эмда физика-математика факультетлери болгъан бютеу баш окъуу заведениелени окъуу программаларына киреди.

РАЕН-ни академиги Орусланы Байдымат айтханнга кёре, джангы чыкъгъан окъуу китабда 63 задача барды. Айтылгъан теманы ала терен ачыкълайдыла.

Аны дагъыда бир энчилиги - задачаланы биргелерине аланы толтурууну методикалары да бериледи, аны кибик анда справка таблицала да бардыла. Айтыргъа, бу ашхы окъуу китаб бла Эресейни эмда тыш къралланы профилли баш окъуу заведениелерини окъуучулары хайырланыргъа боллукъдула.

МАРАЛЛАНЫ Ина.