«Къарачайны» июлну 29-да чыкъгъан 57-чи номеринде Россия Федерацияны Президентини Шимал Кавказ федерал округунда Толу эркинликли келечиси Белавенцев Олегни, Къарачай-Черкесиягъа кърал джолоучулукъ бла келиб, Къобан районну Кавказский посёлогунда орналгъан православ храм бла муслиман межгитде болгъаныны, андан сора Черкесск шахарда «Джашил айрымкан» деген паркга къарагъаныны юслеринден хапар берген эдик. Уллу къонакъ ол кюн республиканы Черкесск шахарда орналгъан эм уллу промышленность предприятиеси «Квест А» ООО-да болгъан эди. Бюгюн аны юсюнден да хапар берирге излейбиз.
«Квест А» ООО джюнню джарашдыргъан эмда андан хар къайда да изленнген асыулу халы ийирген фабрикады. Аны иши бу санагъатда алкъын джюрюмеген джангы технологияланы хайырландырыуну тамалында къуралгъанды. Кеси да Къарачай-Черкесияда эм джаш, алай а аллына уруб баргъан эм уллу промышленность предприятиеди.
Белавенцев Олег Къарачай-Черкесияны Башчысы Темрезланы Рашид бла бирге, предприятие бла танышхандан сора, аны джюнден халы ийирген эмда хазыр продукция чыгъаргъан цехинде болуб, анда иш процесслени къалай къуралгъанларына эс бёлюб къарагъанды. Темрезланы Рашид да анда хар затдан анга хапар бериб баргъанды. КъЧР-ни Башчысы билдиргенден, быллай предприятие Шимал Кавказ федерал округда биринчи болуб бизни республикада ишленнгенди. Кърал джанындан гарантия табыуну юсю бла ол кърал болушлукъ берген фабрика дараджагъа да чыкъгъанды. Бу зат, айхай да, аны джетишимли ишлерине себеблик этиб да турады.
«Арт эки джылны ичинде фабрика чыгъаргъан халы джыл сайын 2,5 минг тоннагъа ёсюб баргъанды. Продукцияны асыулулугъу да кёлтюрюлгенди. Бусагъатда бизни предприятиебизде 400-ге джууукъ адам ишлейди», - дегенди фабриканы директору Халкёчланы Марат, къонакълагъа «Квест А» ООО-ну юсюнден хапар айта.
Ол билдиргенден, фабриканы продукциясы, арада этилген келишиулени тамалларында тюкенлени юслери бла сатылады. Ала уа къралны тюрлю-тюрлю регионларында орналгъандыла. «Бизни бла иш джюрютюрге Кърым Республиканы джюнчюлери да бек къызыныбдыла», - дейди предприятиени башчысы. Ол, джюнню бояб чыгъарыргъа хазырланнганларын билдириб: «Аны тыйыншлы проектин да джарашдыргъанбыз», - деди дагъыда.
Россия Федерацияны Президентини Шимал Кавказ федерал округда Толу эркинликли келечиси Белавенцев Олег келечиликни фабриканы къралны башха регионлары бла, аланы ичинде Кърым Республика бла иш джюрютюулерин къураргъа эмда ёсдюрюрге болушуругъун айтды.
Андан сора Белавенцев Олег, предприятиени ич джашаууна къайтыб, предприятиеде ишни къалай къуралгъаныны, урунууну джорукълары къалай сакъланнганларыны юслеринден къызыныб сорду. РФ-ны Президентини Толу эркинликли келечисини ол соргъанына КъЧР-ни Башчысы Темрезланы Рашид джууаб берди. Ызы бла да Халкёч улудан мындан ары кёзюуде да фабрикада урунуу джорукъланы толу сакъланныкъларын, ишлегенлеге тыйыншлы урунуу болумла къураб турлугъун изледи. Россия Федерацияны Президентини Шимал Кавказ федерал округда Толу эркинликли келечиси уллу асыулулугъу болгъан продукцияны чыгъаргъан фабриканы ишин игиге санагъанын билдирди.
Кертисинде да «Квест А» ООО чыгъаргъан джюн халы Тюркден, Германиядан, аны кибик башха къралладан Россиягъа келтирилиб сатылгъан халыладан артха къалмайды. Багъасы уа аланы багъаларындан эсе гитчеди. Ол себебден аны Россияны ичинде да, андан тышында да бек багъалатыб аладыла.
