Никкол (июнь) айны 25-ден, Къарачай-Черкес Республикада, Эресей Федерацияны бютеу регионларындача, РФ-ны Конституциясына кийирирге теджелген къошакъ тюрлениулени хакъындан сайлаула бардырылыб башлагъандыла.

«Эртденбла сагъат 8-де республикада 250 сайлау участокну эшиклери ачылыб, ишлеб башлагъандыла. Алада ишлерик сайлау комиссияны членлерини саны 2500-ге джетеди. Ала бла биргелей Джамагъат палатадан 1250 къараучу сайлаула джорукъ бузулмай ётериклерине кёз-къулакъ боллукъдула. Ала 5 политика партияны эмда талай джамагъат къозгъалыуну келечилеридиле. Участокланы барында да адамланы къоркъуусузлукъларын сакъларгъа джарагъан затла эркиндиле», - деб хапар айтханды КъЧР-де Сайлау комиссияны председатели Абазалыланы Лариса.

Ол чертгенден, регионну башчылыгъы адамланы къоркъуусузлукъларына уллу эс бёледи, сайлау участокда тургъанла бары да маскала, къоллукъла, халатла, адамны бетин саулай да джабхан пластик экранла бла толу баджарылыбдыла. Аны тышында да, кёзюу кёзюую бла, мекямланы эшиклерин, терезелерин ачыб, хауа урдурлукъдула, дезинфекция ишле бардырлыкъдыла. Хар келген адамны босагъада температурасын ёлчелеб, къолларына дезинфекция этген суусунну къуюб, аласыз келгеннге маска, къоллукъ бериб, ичине алай иерикдиле.

Бир къауум сайлау участокла эшикде, таза хауада къуралгъандыла. Участокга келирге мадары болмагъан адамланы юйлерине барыб, сакълыкъны джорукъларын бузмагъанлай, чёб атдырыр мадар да къуралгъанды.

«Къарачай» газетни коллективинден адамла да, ишге келирлерини аллы бла, кеслери джашагъан джерледе сайлау участоклагъа барыб, граждан борчларын толтургъандыла. Аланы асламысы элледе, джашагъан джерлеринде - Элтаркъачда, Къызыл Къалада, Малокурганный посёлокда, Къарачай шахарда – чёб атхандыла.