Шимал Кавказ федерал округну субъектлеринде бир кюн чёб атыугъа хазырланыу бла аны бардырыуну юсюнден Пятигорск шахарда джыйылыу болгъанды. Аны Россия Федерацияны Президентини Шимал Кавказ федерал округда Толу эркинликли келечиси Белавенцев Олег бла Россия Федерацияны Ара сайлау комиссиясыны председатели Памфилова Элла бардыргъандыла.
Джыйылыуну ишине Къарачай-Черкесияны Башчысы Темрезланы Рашид, округну субъектлерини башчылары, бу округга кирген субъектлени баш кърал къуллукъларыны тамадаларыны заместителлери, Россия Федерацияны Баш прокурору бла Ич ишлерини министерствосуну келечилери, толтуруучу властны территориялада федерал органларыны бир къауумуну, аны кибик ШКФО-гъа кирген субъектлеринде баш федерал инспекторланы да айтыб, Россия Федерацияны ол округда келечилигини къуллукъчулары да къошулгъандыла.
Ала бла да къалмай, джыйылыуну ишине Россия Федерацияны Ара сайлау комиссиясыны членлери, округга кирген регионланы сайлау комиссияларыны келечилери да къатышхандыла.
Россия Федерацияны Президентини Шимал Кавказ федерал округда Толу эркинликли келечиси Белавенцев Олег, джыйылыуда сёлеше: «Биз бу ишни сайлау комиссияла бла кърал властны органлары эмда кеси оноуларын кеслери этген джергили органла бир-бирлери бла къысха байламлылыкъда бардырырча къураргъа керекбиз. Былайда эсигизге салыргъа излейме: сайлау процессни джетишимли ётгени, сайлауланы этапларыны барында аны ачыкъ бардырылгъаны, алагъа къошулгъанла бла электоратны барыны аланы ахыргъы эсеблерин мюкюл этгенлери – бу затла джамагъатны ёсгенин эмда власть къуралышланы этимли ишлей билгенлерин кёргюзген шартладыла», - деб чертгенди.
Джыйылыуда Россия Федерацияны Баш прокуроруну заместители Сыдорук Иван да аны ведомствосу округну территориясында сайлаучула кеслерини сайлау эркинликлери бла толу хайырланырча этер ючюн, сайлауланы барыуларын кёз туурада къаты тутарыгъын айтыб билдирди. Аны кибик ол толтуруучу властны органлары бла прокуратураны органлары сайлаулада биргелей бардырлыкъ ишледе тохтаб сёлешди. Россияны МВД-ны ОООП-ну ГУ-ну управлениесини тамадасы Лесников Ростислав да ич ишлени органлары сайлауланы хазырлау бла бардырыуну заманларында бир-бирлери бла къысха байламлы болуб ишлериклерин айтды.
Джыйылыугъа келгенле Россия Федерацияны Ара сайлау комиссиясыны председатели Памфилова Элланы сёзюне артыкъ да уллу эс бёлюб тынгыладыла.
Ол, бу джолгъу сайлаулада кёб джангы технология хайырландырыллыгъын билдириб, аланы бардырсакъ, биз келир джыл боллукъ президент сайлаулагъа не джаны бла да толу хазырланыб тюберикбиз, деди. Ара сайлау комиссияны башчысы къралны Президенти да, бир тукъум бир фальсификация болмай, сайлаула ачыкъ эмда тюз бардырыллыкъларын излегенин айырыб чертди. Биз да ол излемни толу толурургъа керекбиз, деди ол.
Памфилова Элла билдиргенден, Россия Федерацияны Ара сайлау комиссиясында быйыл июлну 26-дан башлаб, Информацион-справка аралыкъ ачылыб, сайлаучуланы джашагъан джерлеринде аланы сайлаучуланы списокларына къошарыкъларын излеб джазгъан тилек къагъытларына къараб башлагъанды. Ол да бу сайлаулада биринчи кере джюрютюллюк джангылыкъланы бириди, деб чертди Россия Федерацияны Ара сайлау комиссиясыны председатели.
