РФ-ны Конституциясына теджелген къошакъ тюрлениулени ичинде къралны Президентине эмда башха баш оноулу органлагъа тийишген статьяла да бардыла. Ала къаллайладыла?


Эресей Федерацияны Президенти болургъа излеген кандидатха излемле къаты боллукъдула. Джангы тюрлениулеге кёре, хар кандидат Эресейни джеринде эм азы бла 25 джылны джашаргъа керекди. Аны тышында да къайсы болса да бир башха къралны гражданствосу неда джашаргъа эркинлик берген къагъыты болмазгъа керекди. Бу джорукъ аны бютеу джашау джолуна къараб белгиленеди. Сёз ючюн, Эресейден сора да къайсы болса да бир къралны адамы болуб туруб, сайлаулагъа барыргъа излеген заманында ол гражданлыкъдан чыкъгъанлыкъгъа саналлыкъ тюлдю.
Дагъыда бир тюрлениуге кёре къралны Президенти къуллукъну бардырыб туруб, ол къуллукъдан кетгенден сора ол адамгъа закон бла джакълау болургъа керекди деген тюрлениу да барды. Алай а Конституцияны 93-чю статьясына кёре ол джакълыкъ алыныргъа да боллукъду. Ол статьяда айтылгъандан, Эресейни Баш Сюдю РФ-ны Президенти къралгъа къаршчы баргъанын неда башха ауур аманлыкъ этгенин ачыкъласа, Кърал Думаны теджеую бла Федерацияны Совети Президентни ишинден кетерирге эркинди.
Президент къуллугъуну болджалы бошалыб неда кеси разылыгъы бла кетсе уа, джангы тюрлениуле анга закон джакълыкъ этерикдиле.
«Тыш эмда ич политиканы халисин белгилер эмда кърал властны органларыны араларында келишимли байламлылыкъны къурар ючюн» Президент Эресей Федерацияны Кърал советин къурайды. Кърал советни статусу энчи федерал закон бла белгиленникди.
РФ-ны Правительствосуну Председатели къуллукъгъа Президент теджеген кандидатураны къабыл этерге неда этмезге Кърал Думагъа эркинлик берилликди. Аны кибик, Кърал Дума Правительствону Председателини орунбасарларыны, бир бёлек министрлени кандидатураларын да къабыл этерге керек боллукъду. Президент, бусагъатдача, кеси къабыл этген министрле ол тизгиннге кирлик тюлдюле.
Толтуруучу властны къоруулау бла къоркъуусузлукъгъа джууаблы федерал органларыны башчыларын, ич ишлени, юстицияны, тыш къралланы хакъындан, къоркъуулу болумланы хакъындан министрлени эмда РФ-ны субъектлерини прокурорларын къралны Президенти Федерацияны Совети бла кенгешгенден сора белгилерикди.
Аны кибик, Конституцион сюдню, Баш Сюдню, Кассацион эмда Апелляцион сюдлени сюдюлери джорукъ бузгъанлары болса, Президентни теджеую бла, ишден кетерирге Федерацияны Советине эркинлик берилликди.
Аны тышында да, Тергеу палатаны Председателини эмда аны аудиторларыны джартысыны кандидатларын Президент Федерацияны Советине теджерге боллукъду. Эресей Федерацияны Баш прокуроруну джыл сайын къралда джорукъ бла къоркъуусузлукъну сакълау болумну юсюнден эсеблерине да Федерацияны Совети къарарыкъды.
ХУБИЙЛАНЫ Фатима.

 
{jcomments}