КъЧР-ни Халкъ Джыйылыууну (Парламентини) миллет политикадан, тыш байламлылыкъдан, коммерция бла кюрешмеген организацияла бла СМИ-ни хакъындан комитетини председатели Акъбайланы Ренат коронавирус кенг джайылгъан кёзюуде, терк болушлукъ этген машинаны хакъсыз джюрютюб башлагъанды.

«Бусагъатда барыбызгъа да тынч тюлдю. Ай медет, бу ауруу джукъмазлыгъына кишиде ишексизлик джокъду. Медицина къуллукъчула кючлю кюреш бардыргъанлыкъгъа, вирус джайылыб барады. Быллай къыйын заманда барыбыз да биригиб, республикада джашагъанлагъа болушур ючюн, къолубуздан келгенни аямай кюреширге керекбиз. Аны ючюн мен, коронавирусха къаршчы кюрешге къошулуб, мадарыма кёре, адамлагъа болушургъа дегенме»,- деб хапар айтханды Акъбайланы Ренат.

Акъбай улу бу ишин баям этер акъылы болмагъанды. Алай а, депутатны сууаблыкъ иши Къарачай-Черкесияда адамлагъа дженгил огъуна белгили болгъанды. Социал сетледе, джамагъат Акъбай улугъа разылыкъларын билдириб, аны этген ашхы иши къалгъанлагъа юлгю болгъанын чертгендиле.