КъЧР-ни Оператив штабыны джыйылыуунда Къарачай-Черкесияны Башчысы Темрезланы Рашид коронавирусну ачыкълар ючюн этилген тестлени кёбейтирге кереклисини юсюнден борч салгъанды.

Ол ишни тамалында, КъЧР-ни Гигиена бла эпидемиология аралыгъына республиканы медицина учреждениелерини ПЦР-лабораторияларындан тёрт уста джиберилгенди. Андан сора да, аралыкъгъа анализ этерге джораланнган джангы амплификатор табдырылгъанды. Энтда аллай бир аппарат бу кюнледе келирге керекди. Джангы кадрла бла техника къошулгъаны себебли, аралыкъ кече-кюн да ишлеб, кюннге минг анализ этерикди. Ол мадарланы кючю бла КъЧР-де джашагъан кёб адамгъа хакъсыз тестле этилликдиле эмда тестлени дженгил халда бардырырча амал чыгъарыкъды. КъЧР-ни Гигиена бла эпидемиология аралыгъындан сора COVID-19-гъа тестлени Къарачай-Черкес республикан клиника больницаны ПЦР-лабораториясы эмда энчи лабораторияла да бардырадыла. Аллай ишле тохтаусуз барлыкъдыла.

КъЧР-де никкол (июнь) айны 1-не 28205 адамгъа хакъсыз тест этилгенди. Бюгюнлюкде учреждениеде эки ыйыкъгъа артыкъ джетерча тест-системала къуралгъандыла. Пандемия башланнганлы бери КъЧР-ни Гигиена бла эпидемиология аралыгъында тест-системала бла алагъа керек затланы джетишмей къалгъанлары болмагъанды.

 
{jcomments}