Эресей Федерацияны баш законуна – Конституциягъа – кийирилирге боллукъ тюрлениулени бири къралны адамларына тыйыншлы социал джакълыкъ этиудю.

Джангы социал борчла юйдегилеге, аналагъа, аталагъа, сабийлеге кърал болушлукъ этерге, джаш тёлю политиканы бардырыргъа ышаннгылы мадар берликдиле.

Пенсияланы хакъындан Конституцияны 75-чи статьясыны 6-чы бёлюмюне быллай тюрлениуле этилликдиле: «Эресей Федерацияны хар бир адамы да пенсия алыргъа эркинди. Аны бла биргелей, пенсиялагъа эм азы бла джылда бир кере индексация этилирге керекди». Индексация башха социал ачхалагъа эмда льготалагъа да этилликди.

Ол статьяны 7-чи бёлюмюнде социал болушлукъ керекли адамлагъа къралдан аны амалсыз халда табдыргъанлай турургъа эмда хар адамгъа федерал закон бла социал страхование этерге деб да айтылады.
Конституциягъа адамлагъа социал эмда экономика болушлукъ этиуню хакъындан къошакъланы кёб адам огъурайды.

Федерацияны Советини вице-спикери Галина Карелова айтхандан, къралны баш закону властны адамланы алларында социал джууаблылыгъын кескин белгилейди. «Багъала не къадар кёлтюрюлселе да, пенсияла бла пособиелени ёлчеми аладан гитче боллукъ тюлдю. Дунияда, бизни къралда да бюгюннгю экономика болумгъа къарагъанда, ол бек керекли законду. Бара баргъан джашауда да индексация этилиу адамлагъа уллу магъаналы иш боллукъду», - дегенди Галина Карелова.