Бу кюнледе Къарачай-Черкес Республика «Волонтёры Конституции» деген федерал проектге къошулгъанды. Аны тамалында волонтёрла, Эресей Федерацияны Конституциясына къошулгъан тюрлениулени джамагъатха билдириб турлукъдула.

Мындан алда Правительствону Юйюню Гитче залында, ишчи къауум, ол уллу проект джашауда къалай толтурула баргъаныны юсюнден сёлешгенди. Аны тамалында волонтёрла Бютеуэресей чёб атыуда, Конституциягъа къошулургъа боллукъ тюрлениулени миллетге билдирликдиле.

«Бу ишге къошулургъа излегенле бусагъатда «волонтёрыконституции.рф» деген сайтда тергеуге алына турадыла. Ол бир къауум уллу ишлеге къошуллукъ джамагъат къозгъалыу боллукъду», - деб хапар айтханды «Волонтёры Конституции» деген штабны члени Къойчуланы Хусей.

Ол билдиргенден, «Волонтёры Коституции» деген Бютеуэресей джамагъат къозгъалыу къурауну Ара Сайлау комиссиягъа Волонтёр аралыкъланы ассоциациялары, Джаш тёлюню уллу волонтёр бирлешликлери теджегендиле.

Алай бла проектни тамалында арттотур (апрель) айны 6-дан 21-не дери Къарачай-Черкес Республиканы адамла кёб джыйылгъан джерлеринде  джамагъатха айтыу-ангылатыу джерле ачыллыкъдыла. Къуру Черкесскеде огъуна аллай он джер къураллыкъды.

Кеслери разылыкълары бла ишлеген уллу командагъа къошулургъа излеген,  «волонтёрыконституции.рф» деген сайтда тергеуге тюшерге керекди эмда онлайн бардырылгъан окъуугъа къошулургъа тыйыншлыды. Аны ахырында билимлери керекли дараджада болгъан волонтёрла аккредитация аллыкъдыла. Заявканы алтотур (март) айны 16-на дери берирге керекди.

(Бизни корр.).