Къарачай-Черкес Республиканы Башчысы Темрезланы Рашидге Инстаграмда келген тилеклени, тарыгъыуланы, сорууланы учу-къыйыры болмагъанчады. Айхай да, Темрез улу къаллай тюрлю тарыгъыугъа да уллу эс бёледи, хар бирине джууаб береди, бир мадар болса болушлукъ этеди.
Озгъан ыйыкъда келиб, терк халда болушлукъ этилген бир бёлек тарыгъыуну теджейбиз бюгюн газет окъуучулагъа.
Джёгетей Аягъы районну Московский посёлогунда джашагъан тиширыу посёлокда орналгъан ёксюз эмда ата-аналары къарамай къойгъан сабийле тургъан республикан сабий юйде ишлегенлеге, джашагъанлагъа да дезинфекторла берсегиз, деб тилегенди Башчыдан. Темрез улу ары да, республиканы башха социал учреждениелерине да кереклисича бир дезинфекция этген суусунну ашыртханды.
Белгилисича, бу кюнледе «Арнест» АО-ну тамадасы Салага Алексей сууаблыкъ халда 5000 дезинфекция суусунну бергенди республикагъа. Темрезланы Рашид алгъы бурун республиканы социал учреждениелерин баджарыргъа буюргъан эди.
Черкесск шахарда джашагъан бир тиширыу билдиргенден а, А.Дауров атлы кърал колледжде окъугъан къызына стипендия берилмегенли эки ай болады. Къызчыкъны атасы ауушханы амалтын, ол ёксюз сабийлени тизиминдеди. Аны тышында да анасы сакъатды.
Башчы бу соруугъа терк огъуна эс бёлгенди, сабийге экинчи кюн стипендия тёленнгенди.
Джёгетей Аягъы шахарны Московский посёлогуну 9-чу номерли кёб фатарлы юйюнде джашагъан тиширыу билдиргенден, ыйыкъдан артыкъ заманны бу юйде суу джокъду. Джёгетей Аягъы районну администрациясы айтылгъан джерге Водоканалны ишчилерин ашыргъанды. «Комфорт» ООО УК-ны ишчилери алайгъа барыб къарагъанларында, юйню биринчи бла экинчи къатыны араларында суу быргъы аман болуб, тешилиб, андан да суу кетиб баргъанын ачыкълагъандыла. Керекли ишле бардырылыб, юй суу бла толу баджарылгъанды.
«Къартларыбыз бла сабийлерибиз сууукъдан юшюйдюле, джылыналмай, барыбыз да кече сайын къалын кийиниб джатабыз. Ток печкаланы кереклисича джылытыргъа къарыулары джетмейди. Къарт анабыз асыры къыйналгъандан джылагъан этеди», - деб джазгъанды Хабез районда джашагъан тиширыу. Ол айтхандан, Хабез элни кёб фатарлы юйлеринде джылыу джокъду.
Ачыкъланнганнга кёре, кёб фатарлы юйлеге джылыу бергенни тохтатыр заман джетиб тыйылгъанды ол. Алай а Хабез районну администрациясы бла «Теплоэнерго» КЧРГУП оноулашыб, кюн джылыннгынчы элни кёб фатарлы юйлерине джылыуну джангыдан иерге дегендиле.
Темрезланы Рашидге Инстаграмда кёб тюрлю соруу, тилек келеди. Бу социал сетни болушлугъу бла адамла сорууларына терк халда джууаб табадыла.
Басмагъа ХУБИЙЛАНЫ Фатима хазырлагъанды.
