Мындан алда Къарачай-Черкес Республиканы Башчысы Темрезланы Рашид Москвада Эресей Федерацияны «ДОМ. рф» компаниясыны баш директору Виталий Мутко бла тюбешгенди. Ала Къарачай-Черкесияда юйлени къурулушларын бардырыуну эмда кёб фатарлы юйлени арбазларын игилендириуню юсюнден этилген кесаматха къол салгъандыла.

«Миллет проектлени айырыб да «Жильё и городская среда» деген миллет проектни джашауда орунлу этер ючюн салыннган планла бла борчланы толтурур ючюн, Москвада Эресей Федерацияны «ДОМ. рф» деген компаниясыны баш директору Виталий Мутко бла кесаматха къол салгъанбыз. Ол иш бизни республикада юйлени къурулушларын бардырыргъа, адамла джашагъан юйлени арбазларын айбатлы этерча мадар береди.

Аны тышында да этген кесаматыбызны тамалында юйлени багъаларын учузуракъ этерге, юйлени арендагъа бериу рынокну ёсдюрюрге бусагъат заманны излемине кёре, шахарланы айбатлы этиуню программасына къошулууну мадарларын кёб этерге излейбиз.

Виталий Леонтьевичге Къарачай-Черкесияны социал-экономика ёсюмю, не тюрлю джаны бла да, тири джюрюш алырча, бизге болушлукъ табдырыб тургъаны ючюн, разылыгъымы билдиргенме.

Бизни шохлукъ, нёгерлик тутханыбызны уллу магъанасы болгъанына  толу ышанама. Аны хайырын бизни республиканы хар адамы кесини юсюнде сезерикди», - деб джазгъанды Инстаграмда Къарачай-Черкес Республиканы Башчысы Темрезланы Рашид.

(Бизни корр.).