Къарачай-Черкесияны Башчысы Темрезланы Рашид Инстаграмда аккаунтунда республиканы джамагъатыны тарыгъыуларын окъуб, аланы къоратыр джанындан тыйыншлы оноула этеди.
Бу кюнледе Темрез улугъа талай тарыгъыу келгенди. Аланы барына да къаралыб, керекли джумушла бардырылгъандыла, тилекчилени барына да джууаб берилгенди. Бюгюн газет окъуучуларыбызгъа аллай тарыгъыуланы бир къауумун теджейбиз.
Зеленчук районну Ильич элини багуш къотарылыучу джеринде багушха от тюшгенди. Элчиле кеслери къарыулары бла джукъ эталмай, болушлукъ да табмай, Интернетде Башчыгъа тилекчи болуб джазгъандыла. Ол кюн огъуна Зеленчук районну администрациясыны бегими бла отну джукълатыргъа керекли техника берилгенди. От толусу бла, юсюне топуракъ къуюлуб, джукълатылыннганды.
«Хурметли Рашид Бориспиевич! Сизге тилекчи болуб джазама. Бизни юйде кюнортадан бери электрокъууат джокъду. Бузугъун кесибиз табалмагъанбыз. Юйде беш ууакъ сабий барды, юйню джылытыучу чоюн электрокъууат бла ишлейди. Токчулагъа телефон бла сёлешиб айтханымда бири-бирлерине ашырдыла, андан сора, «Адыге-Хаблге этигиз», дедиле. Анда диспетчер а: «Бусагъат иейим усталаны, алай а 5 минг сом тёлерге керексиз», - деди. Мен сабийлеге къуру 10 минг сом пособие алама, аллай бир ачханы къайдан табаллыкъма? Токчула неге керекдиле да сора? Бир мадар этигиз», - деб джазгъанды Адыге-Хабль районну Грушка хуторунда джашагъан тиширыу.
Темрезланы Рашид Адыге-Хабль районну администрациясына бу болумну тюзетирге борч салгъанды.
Администрация электрокъууат бла баджаргъан къуллукъну ишчилерин тиширыуну тогуна къараргъа ашыргъанды. Электрокъууатны кючю кёзюу кёзюую бла кючлю, къарыусуз болуб тургъаны амалтын, автомат халда ишлеген счётчикле бузулгъандыла, бир-бир джерледе чыбыкъла да кюйгендиле. Токчула ол бузукъланы тюзетиб, тиширыуну юйюне электрокъууат кереклисича берилиб турурча этгендиле.
КъЧР-ни Башчысы Темрезланы Рашидге Инстаграмда Къумуш элни адамлары: «Элни сабий садыны джеринде орналгъан суу быргъыла аман болуб, атылгъандыла, бизге не мадар?» - деб соруб джазгъандыла. Аны кёрюб, Къарачай районну администрациясы алайгъа джергили водоканалны къуллукъчуларын ашыргъанды, ала да терк заманны ичинде быргъыланы джамаб, суу кетгенни тыйгъандыла.
Башчыны аккаунтунда тилеклерин Къобан районда Счастливое элни адамлары да джазгъандыла. Элни орта школуну 4-чю классыны сохталары тепсеу хазырлагъандыла. Аны бла байламлы, мадар бар эсе, сабийле ол тепсеулери бла, Уллу Хорламны кюнюне аталгъан байрам концертге къошулсала, деб тилегендиле адамла.
Къобан районну администрациясы ол сабийлени концертге чакъырыб, алагъа кеслерини тепсеулерин сахнада кёргюзюрге эркинлик берирге оноу этгенди. Ол концерт районну Джарыкълыкъ юйюнде бардырыллыкъды.
Багъалы газет окъуучула! Хар адамны да Къарачай-Черкес Республиканы Башчысы Темрезланы Рашидге Инстаграмда джазыб, соруууна, тилегине, тарыгъыууна толу, тыйыншлы джууаб табаргъа мадары барды.
Басмагъа ХУБИЙЛАНЫ Фатима джарашдыргъанды.
